Proverbios 15:2-15

²Dule-binsaed-ibed-e-sunmakedi, binsaed-nuegan uked. Dule-binsaedsulidaed-e-sunmakeddina, binsaed-isgana uked.

³Bab-Jehová bela negdakmaid. Dule-nuedgi nakulemaid, dule-isganagi nakulemaibalid.

⁴Gayaburba-gwage-gadi-gadi-imakedi, ina-nuediyobid. Gayaburba-isganadina, emarga gwage-naibid uked.

⁵Dule-binsaedsulidaedi, e-bab-e-unaed isdarsunna itodaed. Dule-e-bab-e-unaed-nabir-itogeddina, itoakwaadaed oyoged.

⁶Dule-innikidaed-e-neggine, ibmar-bukidar nikaguad. Dule-isganadina, na e-ibmar-bukidar-amiedgine, bonigan ega noed.

⁷Dule-binsaed-ibegan-e-sunmakedgi, binsaed-nuegan ainied. Dule-binsaedsulidamaladdina deyob sunmaksulid.

⁸Bab-Jehová dule-isgana-ega-ibmar-ogumakar-ukedi, gwen nabir-daksulid. Bab-Jehová, dule-innikidaed-ese-goledgindina, yeer itodaed.

⁹Bab-Jehová dule-isgana-e-daed gwen nabir-daksulid. Dule-igar-inniki-imakdiiddina, nue-sabed.

¹⁰Dule-galagwensuli-gudiidga, sabsur-odurdakleged-igar maid. Dule-odurdakleged-igar-isdar-dakdiiddi, unnila oburgweleged-igar ega maid.

¹¹Bab-Jehováʼgi, neg-uan dukumaisulid, burgwed-igar dukumaisurbalid. Degite, ¡dule-gwage-bule-sunna!

¹²Dule-gwen-nabir-dasulidi, dule-ese-goled isdar-itodaed, degite, dule-binsaed-ibedbali, akasurbalid.

¹³Gwage-weligwaledi, wagargi magar dakleged. Gwage-wile-itogedi, wagargi magar daklebalid.

¹⁴Dule-magar-neg-itogedi, unnila binsaed-nuedbina gudidaed. Dule-binsaed-sulidaeddina, ibmar-galagwensulid na e-masgunnedyob imakdiid.

¹⁵Dule-wile-itodiidgala, iba-nuegan gwen naisulid. Dule-weligwaledgardina, bane-bane ibabi neg-naid.