Proverbios 15:11-26

¹¹Tayta Diosga ricaycanmi wañojcuna maycho caycashantapis. Chayno ricaycarga runa yarpashancunata ¿imanirtaj mana ricanmanchu?

¹²Mana rispitacojcunaga pï piñacuptinpis manami wiyacunchu. Yachajcunawan goturpaytapis manami munanchu.

¹³Shongun cushisha captenga cäranpis cushishami. Shongun llaquisha captenga cäranpis juc-nirajyashami.

¹⁴Alli yarpaysapacunaga imatapis yachacuytami munan. Mana tantiyacojcunami ichanga upa cashallancho cawan.

¹⁵Llaquisha goyajcunapäga imay junajpis mana allillami. Cushisha goyajcunapämi ichanga imay junajpis fistachöno cushicuylla.

¹⁶Pobrilla carpis Tayta Diosllata manchacur rispitaymi mas alliga, aypalla ima-aycayojpis caycar llaquisha goyänanchïpa ruquenga.

¹⁷Cuyanacur goyashaga yacu calullapis mishquinmi. Aychapis manami mishquinchu mishiwan allgu goyajno goyashaga.

¹⁸Mana rabyaj runaga rimanacuytapis chawächinmi. Imallapitapis rabyacoj runami ichanga juclla piwanpis rimanacun.

¹⁹Guellacunapäga caminunpis casha shata juntashami caycan. Alli runapämi ichanga caminunpis limyu alli puricuy caycan.

²⁰Yachaj wamraga maman-taytantapis cushicachinmi. Mana tantiyaj wamrami ichanga maman-taytantapis manacajman churan.

²¹Mana tantiyacoj runaga upa cayninwan llutanta rurashanpitapis cushicunmi. Alli yarpayniyoj runami ichanga mana pantaypa alli cawan.

²²Shuntacaycur mana parlacuptenga llapan yarpashancunapis manami camacanchu. Achcaj tantiyachejcuna captinmi ichanga yarpashancunapis alli llojshin.

²³Tapucushanta alli cuticherga cushicunmi. Camacashan öra alli willapashanpis mas allimi.

²⁴Alli cajta rurajcunaga janaj pachamanmi aywaconga. Chaynöpami allpa rurinman mana yaycongachu.

²⁵Alli-tucojcuna llapan charashantami Tayta Diosga ushacächin. Biyüdacunapatami ichanga chacrancunatapis chapan.

²⁶Mana allita rurayta yarpajcunataga Tayta Dios melanäcunmi. Allillata yarpar parlaj runacunami ichanga cushicachin.