Proverbio 6:3-32

³Mo siya di, tengel daka sin panakabalin di ipogaw ay sana, ngem siya na di amagem ta mailisi ka: emey ka ay dagos ta manpakombaba ka ay manpakaasi en sisya.

⁴Adi kan man-illeng pay laeng ono maseyep.

⁵Ipakat moy kabaelam ay bomolos ay kaman din iyat di ogsa ta ilayawana din manganop ono din iyat di titit ta ilisiana din tagdey.

⁶Sik-a ay nasadot, adalem din biyag di koton ta lomaing ka.

⁷Maga di pangolo da,

⁸ngem man-olnong das kanen da sin tiyagew ya pinag-aani ta say maisagana di kasapolan da sin pinag-oodan.

⁹Ay daetan pay sas seyep mo? Pig-an pay di bomangonam?

¹⁰May, maseseyep ka pay, man-illeng ka pay,

¹¹ngem di pantongpalana et bigla ay bomiteg ka ay kaman din inakewan di tollisan.

¹²Din makedse ay ipogaw ay magay silbi na yan lomikeliked ay man-et-etek.

¹³Mankedyakedyat ya mansinyasinyas ta ietekan daka.

¹⁴Sinisikap di naigto sin nemnem na, pag lawa di panggep na ya sisya di mangiloglogis adi pankikinaawatan.

¹⁵Gapo isdi, bigla ay domteng di dosa na ay magay rimidyo na.

¹⁶Waday pito ay ogalin di ipogaw ay kalkaliget Diyos, kadodogis da sin pangila na:

¹⁷din mangipapangatos awak na, din maetek, din manpeses ipogaw ay magay basol na,

¹⁸din manplano si lawa, din alisto ay en man-amag si lawa,

¹⁹din mangitistigos baken tet-ewa ya din mangilapo si adi pankikinaawatan di sinpamilya.

²⁰Anak ko, tongpalem din bilbilin amam yan adi kan liwliw-an din init-itdon inam.

²¹Kanayon koma ay nemnemnemem dasa.

²²Din init-itdo da di mangipango en sik-a mo waday emeyam ya manilib en sik-a mo maseyep ka. Mo bomangon ka et say mamagbaga en sik-a.

²³Tan din bilbilin ya pamagbaga da et maiarig si silaw ay mangipaila si iyat mo ay manbiyag.

²⁴Ilisi daka sin makasolisog ay kalin di makilallalaki ay babai.

²⁵Adi kan aklongan din kinapintas na ono maawis sin mata na.

²⁶Tan banol di tinapay di ibayad mo sin hostess, ngem dilikado di biyag mo sin babai ay waday asawa na.

²⁷Ay mabalin aya ay ibolsikom di apoy yan adi mapooan din badom?

²⁸Mo gatinan di esay ipogaw di man-ganggangab ay oling, ay adi maatongan din siki na?

²⁹Siya abe sin makidaag sin asawan di ib-a na, magay adi madosa ay mangamag sina.

³⁰Adi maoyaw di ipogaw ay mangakew ta pangagas nas dagaang na.

³¹Ngem mo mad-asan, bayadana pay dedan di mamin pito ay banol din inakew na ono idawat na am-in ay wadan sisya.

³²Ngem din makibabai et magay nemnem na, tan owat nan dadaelen di awak na.