Proverbio 5:4-22

⁴ngem sin odi na, maiarig din babai ay sana si manpait ay kedet ya matadem ay kampilan ay nanbinas-il di tadem na.

⁵Din panturongan di siki na et pese, tan din pandanana et manturong sin kad-an di natey.

⁶Adi na on-onodan din danan ay manturong si biyag. Nasangaw sisya ay manlikeliked sin nakillokillo ay danan, ngem adi na ammo.

⁷Isonga ed wani, dengngem din ibagak yan adi kan liwliw-an.

⁸Addawiam din kaman nidi ay babai. Adi ka polos somag-en sin pantew di beey na.

⁹Tan mo somag-en ka, posen di odom din dayaw mo yan pilit ay idawat mo si ipogaw ay magay seg-ang na din ginon-od mo sin pigay tawen di biyag mo.

¹⁰Alaen di mangili din kinabaknang mo ay inligligatam.

¹¹Sin odi na, manbayeweng ka tan enggay komapsot din awak mo.

¹²Et kanam, “Apay nga sinigaak ay maitdoan ya mabagbagaan?

¹³Apay nga adiak dedan inkaskaso din omit-itdo?

¹⁴Ed wani, sangsangoek di kaibabainak sin sangoanan di natopog ay kaipoipogaw.”

¹⁵Say inomem anggoy din danom ay mapo sin bobon mo.

¹⁶Baken ka koman kaman ginawang ay mabalin ay pan-inoman di olay sino ay babai.

¹⁷Din bobon mo et paran sik-a anggoy ay adi makibingay di odom.

¹⁸Mabindisyonan koma din obbog mo. Maragsakan ka koma sin inasawam manipod sin kabarom.

¹⁹Napintas sisya yan mapteng ay boyaen din gonay na ay kaman ogsa. Maragsakan ka koma sin soso na yan kanayon koma ay mapnemapnek ka sin layad na.

²⁰Anak ko, apay nga maawis ka sin asawan di odom ta say maragsakan ka sin soso na?

²¹Tan si Diyos et iilaena am-in ay am-amagen ya em-emeyan di ipogaw.

²²Din basol di mangam-amag si lawa et kaman tagdey ay mangna en sisya.