Proverbio 4:6-26

⁶Adi kan dokdokogan et say mangayowan en sik-a, ipateg mo et salakniban daka.

⁷Say kapatgan ay banag din sirib, isonga ipakat moy am-in ay kabaelam ay mangon-od olay intoy kaligat na, siya abe sin panakaawat.

⁸Dakdake ay dayaw di magon-od mo mo awatem ya banolem din sirib.

⁹Mo say iyat mo di, manbalin din sirib ay kaman mankanapteng ay sabsabong ay maikorona en sik-a.”

¹⁰Anak ko, dengngem ya patiem din ibagak ta omando din biyag mo.

¹¹Init-itdoak sik-a ta lomaing ka ya onodam di kosto ay danan.

¹²Mo mandan kas di, magay manawad en sik-a ya adi kan maisokba mo managtag ka.

¹³Adi kan linglinglingan din inad-adal mo. Ayowanam tan say poon di biyag mo.

¹⁴Adi kan em-emey sin em-emeyan di mangam-amag si lawa ya adi kan on-onodan din am-amagen da.

¹⁵Addawiam din mangam-amag si lawa, dokogam ya taynam daida.

¹⁶Tan adi da maseyep mo adi da man-amag si lawa ya mo magay ipogaw ay kedsean da.

¹⁷Din pangam-amagan das lawa ya kinekedse et kaman makan ya inom para en daida.

¹⁸Din pomatpat-aana sin agsapa et say kaiarigan din danan di nalinteg. Pomat-a ay pomat-a enggana ay komayang din agew.

¹⁹Ngem mabolinget ay kaman labi din danan di managbasol et adi da ammo di kaisokbaan da.

²⁰Anak ko, estem ay dengngen din kalik ya pamagbagak.

²¹Adi kan liwliw-an mo adi et igtom sin nemnem mo.

²²Tan say poon di biyag ya salon-at di olay sino ay mamati isna.

²³Ilaem ta mas es-estem din nemnem mo mo olay sino ay nabanol en sik-a, tan say poon di biyag mo.

²⁴Adi ka man-et-etek ono manbolboladas.

²⁵Estem ay ilan din kosto ay sangoanam

²⁶ta doritso ya mapteng di pandanam.