Proverbio 4:3-15

³Sin kakitkittoy ko pay laeng, esaak ay anak sin beey da amak yan bogbogtong ay anak sin pangilan inak.

⁴Kanan amak ay namagbaga en sak-en, “Adi ka liwliw-an din ibagak. Tongpalem din bilbilin ko ta matagotago ka.

⁵Gon-odem di sirib ya panang-awat yan adi kan tetewengen ya liwliw-an din pamagbagak.

⁶Adi kan dokdokogan et say mangayowan en sik-a, ipateg mo et salakniban daka.

⁷Say kapatgan ay banag din sirib, isonga ipakat moy am-in ay kabaelam ay mangon-od olay intoy kaligat na, siya abe sin panakaawat.

⁸Dakdake ay dayaw di magon-od mo mo awatem ya banolem din sirib.

⁹Mo say iyat mo di, manbalin din sirib ay kaman mankanapteng ay sabsabong ay maikorona en sik-a.”

¹⁰Anak ko, dengngem ya patiem din ibagak ta omando din biyag mo.

¹¹Init-itdoak sik-a ta lomaing ka ya onodam di kosto ay danan.

¹²Mo mandan kas di, magay manawad en sik-a ya adi kan maisokba mo managtag ka.

¹³Adi kan linglinglingan din inad-adal mo. Ayowanam tan say poon di biyag mo.

¹⁴Adi kan em-emey sin em-emeyan di mangam-amag si lawa ya adi kan on-onodan din am-amagen da.

¹⁵Addawiam din mangam-amag si lawa, dokogam ya taynam daida.