Proverbio 31:4-30

⁴Baken lemebbeng ay man-inom di ari si arak ya odom ay bemeteng

⁵tan mo mabeteng da et liw-an da din linteg ay inkeddeng da ya adi dan itonton din kalintegan di nabiteg.

⁶Say maidawtan si bemeteng din dandani ay matey ya palaloy ladingit da

⁷ta liw-an da din ligat da ya kaseseg-ang ay kasasaad da.

⁸Masapol ay salaknibam din adi makaitakder si kalintegan da.

⁹Masapol ay magay panlaslasinem ya salaknibam din kalintegan di nabiteg ya kaseseg-ang.

¹⁰Naligat ay man-ilas nalaing ay babai ay siged di ogali na. Din asawa ay kaman nidi et nabanbanol mo din kabanolan ay kowintas.

¹¹Mantalek din asawa na en sisya, yan kanayon di pansigdan ay idawat na.

¹²Din amagena sin amin ay agew di biyag na et siged di pantongpalana en asawa na, baken lawa.

¹³Man-anap si sinolid et nagaget sisya ay man-amag si bado.

¹⁴Maiarig sisya si bapor ay ad-adoy kalga na, tan man-isaa si makan ay napo sin addawi.

¹⁵Daan pomat-a yan bomangon sisya ay mangisagana sin kanen di pamilya na ya baa na.

¹⁶Estena ay man-ilas daga ta lakoana, asi na eskan si obas ay nilakoana si odom ay pansapolana.

¹⁷Nagaget ya mabikas ay man-obla.

¹⁸Ammo na di banol din am-amagena et man-obla engganas emletan di labi.

¹⁹Sisya ay mismo di mangabel si lopot

²⁰ya badangana din nabiteg ay makasapol.

²¹Waday kamayatan ya naposkol ay ibadon din pamilya na et magay pandanagana olay mo mangandap.

²²Sisya ay mismo di mangamag si galey ya ap-ap di katri et amin ay bado na yan mankanapteng ay kaman din osal di ari.

²³Si asawa na yan esa ay mandinamag ya mabigbigbig ay pangolo sin ili.

²⁴Man-am-amag sisya si bado ya bilko ay ilako na sin man-ilaklako.

²⁵Mabikas sisya ya mapteng di ogali na, yan adi madanagan maipanggep sin omal-ali ay timpo.

²⁶Masirib sisya sin iyat na ay mankali yan nainayad di iyat na ay mamagbaga.

²⁷Es-estena din pamilya na yan kanayon ay nagaget sisya.

²⁸Idaydayaw din an-ak na yan it-it-ek aben asawa na ay kanana,

²⁹“Ad-ado di siged ay babai, ngem sik-a di kasigedan.”

³⁰Din kinapintas yan mangietek ya wada abey timpo ay komopas, ngem din babai ay mangipateg en Diyos et lebbeng na ay maidayaw.