Proverbio 27:1-16

¹Adi kan it-it-ek din amagem si bigat, tan adi ka ammo din mapasamak sin inagew.

²Adi kan it-ek din awak mo, sed-em ay odom di mangit-ek en sik-a.

³Madagsen di bato ya darat, ngem madagdagsen pay di problima ay pawadaen di naong-ong.

⁴Makedse ya kaeegyat di ipogaw ay mabonget, ngem nakarkaro pay di man-imon, tan maga di makalisi en sisya.

⁵Maymayat di doritso ay pamagbaga mo din layad ay adi maipaila ono maipaammo.

⁶Mabalin ay talkem din panggep di esa ay gayyem ay nasakit di pamagbaga na, ngem et-etek din ad-ado ay ongon di kaibaw.

⁷Kaman baken mam-is di anig mo nanabsog di ipogaw, ngem mo mandagaang, olay din manpait yan kanana en mam-is.

⁸Din ipogaw ay addawi sin beey na yan kaman titit ay inmaddawi sin obong na.

⁹Omiparagsak din lana ya bangbanglo, ngem masepsep din pamagbagan di napodno ay gayyem.

¹⁰Adi kan dokogan di sigod ay gagayyem di pamilyam. Adi kan say emeyan din aag-im sin addawi mo waday ligat mo tan ad-ado di maitolong din katokmang mo mo daida.

¹¹Anak ko, ipailam ay masirib ka ta maragsakanak ya waday isongbat ko si olay sino ay mangoyaw en sak-en.

¹²Din naannad yan maila na di domteng ay problima et lisiana, ngem din magay ammo na yan dalasodos, isonga lak-amena di ligat.

¹³Din mangitakder si otang di sangsangaili et masapol ay tenglen din nangiotang din sanikwa na ta mangipasigurado ay manbayad sisya.

¹⁴Mo sapaem ay bokaen di gayyem mo babaen si kablaaw mo et kaman mo met laeng binaosan.

¹⁵Din makaibaw ay asawa ay babai et maiarig si danom ay tomedtetedted.

¹⁶Nalaklaka pay ay depapen di dagem ya egenan di lanan di olivo mo din iyat ay mangipasaldeng en sisya.