Proverbio 24:8-25

⁸Am-in ay manplanos lawa et mandinamag ay makedse da.

⁹Din planoen di naong-ong yan basol. Kaliliget di ipogaw di makalasoy.

¹⁰Nakapsot di nemnem di ipogaw ay manpaabak si ligat.

¹¹Isalakan mo din nakeddengan ay matey. Adi ka baybay-an mo ikaan da ta en da peslen.

¹²Adi kan kanan en adi ka ammo, tan kabaelan Diyos ay ilaen din wadas nemnem mo. Ammo na di nemnemnemen ya am-amagen di am-in ay ipogaw et gon-gonaana am-in maibasar sin am-amagen da.

¹³Anak ko, mangan kas anig, tan waday panmayatana ya mam-is.

¹⁴Siya abe ay waday panmayatan di sirib sin nemnem mo. Mo magon-od mo, waday mayat ay namnamam sin tapin di agew yan sigurado ay matongpal.

¹⁵Adi kan tadonen di tollisan. Adi kan mansiim si akewem sin beey di nalinteg.

¹⁶Tan olay mo mamin pito ay maisokba din nalinteg, bomangon met laeng. Ngem mo din managbasol di maisokba, adi makabangon.

¹⁷Adi ka koman manragsak ay mangila sin kaisokbaan ya katokangan di kaibaw mo.

¹⁸Mo say iyat mo di, adi malaydan si Diyos et makaan din bonget na en daida.

¹⁹Baken koman magolo di nemnem mo begew sin mangam-amag si lawa ya adi kan apalan daida.

²⁰Tan magay mayat ay pantongpalan da et kaman dan lampa ay mad-ep.

²¹Anak ko, patgem ya egyatam si Diyos ya siya abe sin ari. Adi kan maitapi sin komontra en daida.

²²Tan magay makaammo sin bigla ay idawat da ay dosa.

²³Nay da di odom ay pamagbagan di masirib. Baken mayat mo waday pabpaboran sin pangokoman.

²⁴Din mangikeddeng ay magay basol di nakabasol et baosan ya kaliliget di kaipoipogaw isnan lobong.

²⁵Ngem din howis ay manosa si nakabasol et somiged di biyag da ya mabindisyonan da.