Proverbio 23:12-27

¹²Dengngem di pamagbaga ya ipakat moy kabaelam ay man-adal.

¹³Adi kan emegyat ay manoplit sin anak mo, tan adi matey mo say iyat mo di.

¹⁴Di katet-ewa na, mabalin ay say kaisalakanana.

¹⁵Anak ko, palalo di ragsak ko mo manemneman ka.

¹⁶Naragsakak to mo dengngek ay kalin di masirib di iyat mo ay mankali.

¹⁷Adi kan apalan din managbasol mo adi et kanayon ay patgem si Diyos.

¹⁸Mo say iyat mo di, waday mayat ay namnamam sin tapin di agew yan sigurado ay matongpal.

¹⁹Anak ko, dengngem nan pamagbagak. Manemneman ka koma ta say onodam din kosto.

²⁰Adi ka maitaptapi sin makabeteng ya naaklong.

²¹Tan din kaman dadi ay ipogaw et kanayon ay masmaseyep da, isonga bomiteg da ya manbado das nabisngibisngit.

²²Dengngem din pamagbagan amam ay nakaotangam si biyag mo yan adi kan laslasoyen si inam mo enggay mabakes.

²³Ipakat mo din kabaelam ay mangadal si kosto ay todo ya sirib, pamagbaga ya panakaawat, yan adi kan linglinglingan.

²⁴Dadlon maragsakan din aman di nalinteg ya masirib begew en sisya.

²⁵Isonga paragsakem koma da amam en inam ay nangianak en sik-a.

²⁶Anak ko, estem ay dengngen din ibagak ya ilaem abe di kabibiyag ko ta say tadonem koma.

²⁷Din hostess ya din makikamkamalala yan maiarig das malosong ay bito.