Proverbio 20:8-27

⁸Sin pangokoman di ari, timbangena am-in ay pamaneknek ta ilasina di lawa sin siged.

⁹Ay wada aya di ipogaw ay makaibaga ay nalinis di konsensia na ya nalinisan sin basbasol na?

¹⁰Kaliliget Diyos din man-osal si baken kosto ay timbangan ya salopan.

¹¹Olay esay anak yan maammoan mo siged ya kosto di kaipogaw na babaen sin amagena.

¹²Si Diyos di nangamag si inga ay para denge ya mata ay para ila.

¹³Mo kanayon ay maseseyep ka, bomiteg kan to, ngem mo bomangon ka ta man-obla ka, ad-adoy kanem.

¹⁴Din manlako yan manreklamo sin presyon di lakoana, ngem mo komaan yan it-ek na din laing na ay mantawal.

¹⁵Nabanbanol din kalin di masirib mo balitok ya nankangingina ay al-altin di awak.

¹⁶Din mangitakder si otang di sangsangaili et masapol ay tenglen din nangiotang din sanikwa na ta mangipasigurado ay manbayad sisya.

¹⁷Kaman mam-is di makan ay naa si sinasaor, ngem sin odi na yan kaman darat sin tepek.

¹⁸Matongpal di plano mo waday kosto ay pamagbaga, isonga mo makigobat ka, kamangem omona di pamagbagan di masirib.

¹⁹Olay palimed yan dad-aten di makatayoktok, isonga adi ka makipolapol en sisya.

²⁰Mo waday mamaos en ama na ono en ina na, magan-gan-o di biyag na ay kaman silaw ay bigla ay mad-ep sin gawan di labi.

²¹Din tawid ay sapaen di ipogaw ay alaen et adi bindisyonan Diyos sin odi na.

²²Adi ka man-ibaes sin mangamag si lawa en sik-a. Mantalek ka en Diyos et isalakan daka.

²³Kaliliget Diyos din mansowitik babaen si baken kosto ay timbangan ya salopan.

²⁴Adi ka ammo di mapasamak to, tan si Diyos di nangikeddeng sidi.

²⁵Naligat di mangikari si esa ay banag en Diyos yan adi na nemnemen omona.

²⁶Din masirib ay ari et ammo na ay mangilasin sin managbasol yan madagsen di ikeddeng na ay dosa da.

²⁷Din nemnem ono konsensian di ipogaw yan kaman silaw ay osalen Diyos ay manokisok sin kaonegan ay nemnem na.