Proverbio 20:3-15

³Madayaw ay ogali di omaddawi si ibaw. Din naong-ong anggoy di laydena ay makiib-ibaw.

⁴Din nasadot ay adi man-obla sin pinag-aalado et magay apitena sin pinag-aani.

⁵Din nemnem di ipogaw yan naoneg ay kaman din malosong ay baybay, ngem mabalin ay ammoen di masirib.

⁶Ad-adoy mangibaga ay matalek da, ngem ay way makaanap si tet-ewa ay matalek ay ipogaw?

⁷Mo nalinteg di ipogaw ya kosto di am-amagen da, nagasat din aan-ak da.

⁸Sin pangokoman di ari, timbangena am-in ay pamaneknek ta ilasina di lawa sin siged.

⁹Ay wada aya di ipogaw ay makaibaga ay nalinis di konsensia na ya nalinisan sin basbasol na?

¹⁰Kaliliget Diyos din man-osal si baken kosto ay timbangan ya salopan.

¹¹Olay esay anak yan maammoan mo siged ya kosto di kaipogaw na babaen sin amagena.

¹²Si Diyos di nangamag si inga ay para denge ya mata ay para ila.

¹³Mo kanayon ay maseseyep ka, bomiteg kan to, ngem mo bomangon ka ta man-obla ka, ad-adoy kanem.

¹⁴Din manlako yan manreklamo sin presyon di lakoana, ngem mo komaan yan it-ek na din laing na ay mantawal.

¹⁵Nabanbanol din kalin di masirib mo balitok ya nankangingina ay al-altin di awak.