Proverbio 18:3-16

³Din pangamagan si lawa et say kalaslasoyan ya kaibabainan.

⁴Din kalin di masirib et maiarig si malosong ay ginawang ay adi katdok.

⁵Lawa mo pangabaken din nakabasol ya adi maitonton din kalintegan di magay basol na.

⁶Din kalin di naong-ong yan say begew si pakiibawana ya kasoplitana.

⁷Din kali na yan maiarig si bito ay kaknaana ya kadadaelana.

⁸Din apat di tayoktok yan kaman makan ay mam-is ay okmonen.

⁹Din kalawlawan di nasadot yan magay kaitkenana sin makadadael si ib-a na.

¹⁰Si Diyos yan maiarig si makneg ay pantabonan ay pankamangan din nalinteg ay ipogaw.

¹¹Sin pannemnem di babaknang yan maiarig din sanikwa da si nakayang ay alad ay pansalinan da.

¹²Din mangipapangato si awak na yan say begew si kadadaelana. Masapol ay manpakombaba di esa ay ipogaw, asi maidayaw.

¹³Kababain mo waday somongbat ay adi na dengngen omona di salodsod, yan say kailaan di kinaong-ong na.

¹⁴Din pigsan di nemnem di ipogaw di makatolong en sisya sin sakit na, ngem mo magay pigsan di nemnem na, makaan abe di namnama na.

¹⁵Din masirib yan nakasagana ya laylaydena ay man-adal.

¹⁶Idawtam si sagot din nangato ay ipogaw mo laydem ay maam-ammos sisya.