Proverbio 18:12-24

¹²Din mangipapangato si awak na yan say begew si kadadaelana. Masapol ay manpakombaba di esa ay ipogaw, asi maidayaw.

¹³Kababain mo waday somongbat ay adi na dengngen omona di salodsod, yan say kailaan di kinaong-ong na.

¹⁴Din pigsan di nemnem di ipogaw di makatolong en sisya sin sakit na, ngem mo magay pigsan di nemnem na, makaan abe di namnama na.

¹⁵Din masirib yan nakasagana ya laylaydena ay man-adal.

¹⁶Idawtam si sagot din nangato ay ipogaw mo laydem ay maam-ammos sisya.

¹⁷Din ibagan di damo ay mankali sin pangokoman yan kaman kosto mo daan mankali din kalabana.

¹⁸Mabalin ay makeddengan di naligat ay kaso babaen si binonotan ay maikamang en Diyos.

¹⁹Naligligat ay itaoli din panakikadwan di napasakitan di nemnem na ay gayyem mo din iyat ay lomsot si alad di siyodad.

²⁰Apiten di ipogaw di am-in ay ibongan di kali na.

²¹Din kali et makabalin ay say katagoan ono kateyan, isonga din manglaylayad ay mankali et masapol ay awatena mo sinoy ibongan di kali na.

²²Din mangasawa, siged dis gon-odena, tan din asawan di ipogaw et kailaan di seg-ang Diyos en sisya.

²³Manpakpakaasi di nabiteg ay mankali, ngem din baknang yan bodtak di songbat na.

²⁴Waday odom ay gagayyem ay domadael, ngem waday odom ay nasursurok mo agi di kinapodno da.