Proverbio 17:14-25

¹⁴Din panlogian di ibaw et kaman din panlogian di danom ay bomala sin lokaw di beyeng, isonga masapol ay mapasaldeng ay dagos ta baken komaro.

¹⁵Kaliliget Diyos din mangikeddeng ay magay basol din nakabasol ya siya abe sin mangeddeng ay madosa din magay basol na.

¹⁶Magay silbi na ay man-gastos ay man-adal di magay nemnem na, tan sigaana ay maitdoan.

¹⁷Di sin-gayyem et kanayon ay ipaila da di layad da. Di gapo ay waday siag-i et ta mantitinolong das ligat.

¹⁸Magay nemnem di mangikari ay takderana di otang di gait na.

¹⁹Din manglaylayad si ibaw ya mangipapangato si awak na et laylaydena di basol ya an-anapena di kadadaelana.

²⁰Magay pansigdan si gon-oden di ipogaw ay mannemnem ya mankalis lawa. Pag ligat di domteng en sisya.

²¹Din naong-ong ay anak yan magay ragsak si idawat na en ama mo adi et ladingit.

²²Mangipabikas di ragsak ay kaman agas, ngem din ladingit yan pakapsotena di awak.

²³Din lawa ay howis, awatena di pasoksok ay naililimed yan adi na itonton di kinalinteg.

²⁴Din nalaing ay mangilasin si kosto et imongsana di nemnem na sin amagen di masirib, ngem din naong-ong yan magay kosto ay kaimongsanan di nemnem na.

²⁵Ladingit ya sakit di nemnem di idawat di naong-ong ay anak en da ama na en ina na.