Proverbio 16:3-30

³Mo italek mo din planom en Diyos et matongpal da.

⁴Waday planon Diyos sin am-in ay inamag na. Din inkeddeng na ay pantongpalan di ipogaw ay lawa di nemnem na et madosa da.

⁵Kaliliget Diyos am-in din mangipapangato si awak da. Sigurado ay dosaenas daida.

⁶Mapakawan di basol di ipogaw mo napodno di layad na ya komakaman ay matalek. Mo egyatan ya patgen di ipogaw si Diyos, addawiana di panbasolana.

⁷Mo mapnek si Diyos si esa ay ipogaw, iturong na din nemnem di kaibaw din ipogaw ay sana ay makikapya en sisya.

⁸Maymayat di nabiteg ay kosto di ogali na mo din baknang ay makasowitik.

⁹Manplano di ipogaw, ngem si Diyos di mangiturong en sisya.

¹⁰Adi mankamali di ari si ikeddeng na, tan si Diyos di mangipanemnem.

¹¹Say layden Diyos di kostokosto ay timbangan ya salopan.

¹²Napigsa di turay di ari mo nalinteg da, isonga sigaan da din lawa.

¹³Say layden ya patgen da din mangibaga si tet-ewa.

¹⁴Mo bomonget din ari, mabalin ay ipapse daka, isonga mo masirib ka, anapem di iyat mo ta mabaew din bonget na.

¹⁵Mo naragsak din ari ya malaydan en sik-a, seg-angan daka et mabalin ay say katagoam.

¹⁶Addawi ay nabanbanol di sirib ya panang-awat mo balitok ya palata.

¹⁷Addawian din nalinteg di lawa. Estena din ogali na et say salaknibanan biyag na.

¹⁸Din pantongpalan di mangipapangatos nemnem na et din kadadaelana.

¹⁹Maymayat di maitapis nabiteg ay napakombaba mo din makibingay si kinabaknang ay pinnos di ipogaw ay mangipapangatos nemnem na.

²⁰Mayat di pantongpalan di ipogaw ay mangonod si mait-itdo en sisya. Din mantalek en Diyos yan naragsak.

²¹Mo kosto di iyat mo ay mangikeddeng et say kailaan di kinasirib mo. Mo mayat di iyat mo ay mankali, ad-ado di maitdoan.

²²Din kinasirib yan maiarig si obbog ay mangidawat si biyag, ngem din kinaong-ong di ipogaw di mangidawat si kadosaana.

²³Din masirib yan naannad ya makaawis di iyat na ay mankali.

²⁴Din mayat ay kali yan kaman anig ay mam-is ya mangipasalon-at.

²⁵Mo mamingsan, waday kaman mayat sin pangilan di ipogaw, ngem din pantongpalana et din kateyana.

²⁶Gapo sin layad di ipogaw ay mangan, gomaget ay man-obla.

²⁷Din ipogaw ay magay silbi na yan say nemnemnemen da di panproblimaan. Pati din kali da yan domadael ay kaman manbidbidang ay apoy.

²⁸Lawa di mantayoktok, tan din apat yan pawadaena di ibaw ya dadaelena di panaggagayyem.

²⁹Din makedse ay ipogaw yan solisogena din iib-a na, tan awisena ay man-amag si lawa.

³⁰Din ipogaw ay manginenengneng ono mangililid-is en sik-a yan waday lawa ay panggep na.