Proverbio 12:5-28

⁵Kosto din panggep di nalinteg, ngem sinisikap din panggep di makedse.

⁶Din kalin di managbasol yan maiarig si ipogaw ay manseed si peslena, ngem din ibagan di nalinteg yan say mangisalakan en daida.

⁷Mo maipababa din mangam-amag si lawa, enggay mamaga das eng-enggana, ngem din nalinteg yan komakaman din poli da.

⁸Maidayaw di ipogaw gapo sin sirib na, ngem din magay nemnem na yan malaslasoy.

⁹Maymayat di nababa di kasasaad na ay es-esa di katolong na mo din agin ngangato ngem magay kanena.

¹⁰Ayowanan din nalinteg din animal na, ngem din lawa ay ipogaw yan magay seg-ang na.

¹¹Mansobsobra si makan din nagaget ay mangobla si daga na, ngem din owat ad-adoy plano na yan magay nemnem na.

¹²Gamgamen din makedse di magon-od da si lawa ay pamosposan, ngem din nalinteg yan maiarig si manlames ay kaiw ay makneg di lamot na.

¹³Din managbasol ay ipogaw yan kaman makna si tagdey begew sin lawa ay ibagbaga na met laeng, ngem din nalinteg yan mailisi si problima.

¹⁴Ad-ado ya maymayat di gon-gonan di ipogaw gapo sin kali na ay kaman met laeng magon-gonaan insigon sin inamag na.

¹⁵Din naong-ong yan kanan da en pag kosto di am-amagen da, ngem din masirib yan dengngen da di pamagbaga.

¹⁶Din naong-ong et adi makaitpe si bonget na, ngem din masirib yan gomiginek mo insoltoen da.

¹⁷Din tet-ewa di itistigon di matalek ay ipogaw, ngem din baken matalek et pag etek di ibaga da.

¹⁸Din nasakit ay kali yan kaman kampilan ay makasogat, ngem din kalin di masirib yan makaagas.

¹⁹Din tet-ewa yan komakaman si eng-enggana, ngem din etek yan baken mabayag et maammoan.

²⁰Sikap di wadas nemnem di manplanos lawa, ngem ragsak di wada sin mangipawadas olnos.

²¹Magay lawa ay mapasamak sin nalinteg, ngem din managbasol yan ad-adoy lawa ay pasamak sin biyag da.

²²Kaliliget Diyos din maetek, ngem laylaydena din matalek.

²³Din naannad yan adi na dad-aten din ammo na, ngem din naong-ong yan ingalawngaw na din magay silbi na.

²⁴Manbalin ay pangolo din nagaget, ngem manbalin ay bag-en din nasadot.

²⁵Din danag yan nadagsen ay bakbaklayen, ngem din mayat ay kali yan omiparagsak.

²⁶Din nalinteg yan itdo na di kosto ay danan sin iib-a na, ngem din mangam-amag si lawa yan iaw-awanas daida.

²⁷Mandagaang di nasadot tan adi na idawis din inanopana, ngem din nagaget yan nabanol ay kinabaknang di gon-odena.

²⁸Waday biyag sin danan di nalinteg. Din danan ay sana et adi maiturong sin pese.