Proveps-Knare Nomaniza 6:6-24

⁶Eri'zama e'ori feru vahe'motma kipazuvemoza nehaza zante ome negeta, rempi huta nentahita, knare antahizana eriho.

⁷Kipazuvemofona kva vahe'zmia omanigeno, zamazeri ante fatgohu kva vahe zamia omanigeno, kvama krizamante kva vahe zamia omani'neanagi,

⁸ne'zamo'ma rama'ama fore hianknafina nezama omane knafima nesagura, nezana eri atru nehaze.

⁹Eri'zama e'ori feru vahe'motma, nama'a zupa tamavura masegahaze? Nazupa masetamavuna segahaze?

¹⁰Osiagna ko kavura masenka hinkrafora antegenko, osiagna ko mago'ane manifru nehunka, osiagna ko mago'ane kagemazampare kazana antenka manifru hananana,

¹¹mago zanka'a omanetfa hanigenka, kumazafa vahemo atireti kazerino fenozanka'a erivgareankna hugahane.

¹²Mago zazmi omane kefozama nehaza vahe'mo'za akrehe krehe zmageru aruza vano nehaze.

¹³Ana vahe'mo'za havigema nehanuza zamavu resukinegamiza, zmagiareti rekapasga nehu'za, zmazanteti ene erigu'a hu'za avame'namera hugahaze.

¹⁴Havi avu'avazama erifore'ma hu'zamo zamagu'afina avitenege'za, kefo avu'avazana hakare zupa nehu'za, hazenkea eri hakare hu'za nevaze.

¹⁵E'ina hu'negu e'inahu vahetera hantka huno havizamo'a agritera eno, ame huno azeri haviza hanigeno, anama azeri havizama hania knazama eritre kana omanetfa hugahie.

¹⁶Sigisi'a zama Ra Anumzamo ago'matenentea zantami me'neanagi, seveni'a zamo'a Ra Anumzamofo avurera kasrino haviza me'ne.

¹⁷Agra avufga erisga nehuno, ru vahe kefenkami atre'zane, havigema hu'zane, hazenke'a omane vahe'ma aheno korama'a eri fegi atre'zane,

¹⁸havi antahintahizamo antahintahifima mevite'zane, havi zante'ma ame huno avreno neviazane ave'nosie.

¹⁹Keagama refkohu trate osu'nea zanku tamage nehie huno havige hu vahe'ma, zamagipintima krunagema hu'zama atineramia zane, naga'afima hazenke zama eri hakare nehiazana Anumzamo'a agonete.

²⁰Mofavrenimoke, negfa'ma kasamisia kasegea otretfa nehunka, negrera'ma rempi hugamisia kea amge'anto.

²¹Kagu'afi erintenka azeri antakro maka zupa nehunka, avaseseza hiankna hunka rugaginka knankempi anakio.

²²Kama vanoma hananana ana kemo kazeri fatgo nehuno, kavu'ma masesanana kegva huneganteno, masenesampintima oti'sanana nanekea kasamigahie.

²³Na'ankure ama ana kasegemo'a rampe tavikna higeno, amama rempima huneramia kemo'a msa megeno, kazeri fatgohu kavumroma antea kemo'a, manizamofo ka me'ne.

²⁴Savri a'nemo'za kazeri hava huzankura ana kemo kza nehina, neve'enema mni fatgo osu savari avu'avazante vanoma nehania a'mofo haganentake ageru'mo'a kazeri havizana osugahie.