Proveps-Knare Nomaniza 5:3-14

³Na'ankure savri a'mofo agipinti kemo'a, tume rima'amo haga hiankna nehinkeno, agipintima atiramisia nanekemo'a, olivi masavemo fru huno karoro hiankna hugahie.

⁴Hianagi refaregama kesanana, ana amo'a akahe trazankna nehuno, tare kaziga asane'nea kazinkna hu'ne.

⁵E'i ana a'mofo agamo'a fri'zampi uneramino, agama renakereno viazamo'a, fri vahe kerifi nevie.

⁶Ana savari a'mo'a, asimuma erino mani kankura nontahino, kama via kamo'a fatgoa nosianagi antahino keno nosie.

⁷E'ina hu'negu mofavre nimota kenia antahitma, amama tamasamisua kemofona tamagena huomiho.

⁸Ana savari a'mofona atrenka ogantu'a nemaninka, nomofo kasama'arera uravao osuo.

⁹Anama hananana havi kagi e'nerinka, zahufafi kasefa vahe mani'nesanke'za, havi vahe'mo'za kazeri haviza hugahaze.

¹⁰Onke'nesana vahe'mo'za hanaveka'a atrenka eri'nanazana, e'nerisageno, knare zantamima amuho hunka eritru hunte'sana zantamina ru vahe'mo'za erigahaze.

¹¹Henkama frinaku'ma hanana knama esigeno'a, krimo'a kavufafina ra nehuno, kazeri zaferinage hinkenka karagi nerunka,

¹²anage hugahane, na'a higena navumaro kema nenasimige'na, nagokura hu'na navesra hunentena, nazeri fatgo nehigena, ana kea ontahi'noane hugahane.

¹³Nahige'na rempi hunami vahe'mo'zane, nazeri kante ante kema nasami'za vahe'mokizmi kea ontahi'noane hunka hugahane!

¹⁴Nagra mika vahe zmurera haviza hu'na keforoe hugahane.