Proveps-Knare Nomaniza 3:2-27

²Na'ankure kaza nehanigenka, karimpa frune zaza kafuzge knare hunka maninka vugahane.

³Atregeno vahe'ma knare kavukvama huntezamo ene, tamage avu'avamo'a katreno ovino. Hagi knankempi nofi kintegeno me'nena kagu tumote avo krentegeno meno.

⁴E'inama hanankeno'a, Anumzamo'ene vahe'mozanena kavesineganteza, husga hugantegahaze.

⁵Anumzamofona mika kagu'areti hunka antahi'neminka, nagrani'a antahintahiretira makazana hugahue hunka osuo.

⁶Hanki mikazama hanampina antahiminka agihanta nevazigeno, vanana kana azeri ante fatgo hugantegahie.

⁷Kagraka'a antahizankura knare hu'ne hunka eri antesga osunka, Anumzamofonku koro huntenka agorga'a nemaninka, havi avu'avazana kamefi humio.

⁸E'i ana'ma hanankeno'a, kavufa kazeri neganamreno, zaferina ka'a kazeri hanavetigahie.

⁹Feno zanka'anu'ene hozakafima pusama nenama hania nezanteti'ene Ra Anumzamofona aminka, agia eriantesga huo.

¹⁰Ana hanankeno Anumzamo'a kaza nehina nezama ante nonka'amo'a aviteno herafi neramina, waini tintafemofona kasefa waini timo aviteno tagiramigahie.

¹¹Mofavre'nimoka Ra Anumzamoma, kazeri fatgo hania kegura, kamefira huomige, kazeri fatgoma hunaku kazeri akorisiana karimpagna osuo.

¹²Na'ankure mago ne'mo'ma mofavre'ama avesima nenteno azeri fatgo nehiankna huno, Ra Anumzamo'a avesimantea vahera azeri fatgo nehie.

¹³Iza'o knare antahintahigu hakreno e'nerino, antahi ama'huzama erisimo'a, muse hugahie.

¹⁴Na'ankure ana knare antahintahimofona mizama'amo'a, silvaretima e'neriza zgoa agateneregeno, koliretima e'neriza zgoa, mago'ane agatere'ne.

¹⁵Knare antahintahimo'a mizama'amo mreri'nea havea agatere'ne, mago'a zankuma nentahinka kavesi kavesima nehana zantamina ageterene.

¹⁶Zaza knama maninka vuzamo'a, knare antahintahimofona tmaga azampi megeno, hoga kaziga azampina fenone, agi husaga hu'za me'ne.

¹⁷Knare antahintahimofo avu'avama huzamo'a, krimpafru nehunka muse hugahane.

¹⁸Iza'o ana knare antahintahima azerimo'a, asimu eri zafagna hu'neankino, agri avesizama azeri hampo'na hanimo'a muse hugahie.

¹⁹Ra Anumzamo'a knare antahi'zama'areti, ama mopamofo agafa'a erifore nehuno, antahi ama' hu antahizama'areti mona eri fore hu'ne.

²⁰Agra'a antahizanteti higeno timo'a mopa agu'afintira katati huno marerigeno, hampomo'a atakora nerie.

²¹Mofavre'nimoke atregeno knare antahintahizane, havizane knare zanema antahinka refkohu kavukvazana kagripintira fanane osina, kegva huo.

²²Hagi ana antahizamo'a kasimu kaminigenka zaza kna nemaninankeno, asunku'zamo'a knankempi kavasese huganteaza hugahie.

²³Ana nehunka kama vananana, kva hugantenkenka traka osunka, knare hunka vugahane.

²⁴Kavu'ma mase'sanana kore osunka, haga'nentake kavu masegahane.

²⁵Ame huno hazenkema esigenka kagra korera nosunka, kefo vahe'ma knazamo'ma azeri haviza hanigenka, korera osuo.

²⁶Na'ankure Ra Anumzamo kagrira kegva hugante'nesigeno, kagafina krifumo'a aze'origahie.

²⁷Kagrama azama huga kankamunte'ma mni'nesunka, atupama hu'nenaza vahera amane aza huo.