Proveps-Knare Nomaniza 30:11-24

¹¹Mago'a vahe'mo'za nezmafana hu haviza hunezamante'za, nezamrerana musenkea hunozmantaze.

¹²Mago'a vahe'mo'zama antahi'zana kumitia omne'ne nehazanagi, Anumzamofo avurera agrua osu'naze.

¹³Mago'a vahe'mo'za knare hu'none huza zamavufga ra nehu'za, mago'a vahe'mokizmia zmage fenkami netraze.

¹⁴Mago'a vahe'mokizmi zamavemo'a, vahe'ma zamahe bainati kazinkna higeno, tuke zmavemo'a kazinkna huno asaneneankino zamunte omane vahe ene, mago'a zanku'ma upama hu'nesnaza vahera, ama mopafintira zamasga huvazigahaze.

¹⁵Kukufamo'a taremofatre znante'ne. Zanagi'a, Namio, Namioke! Zmavesizama eriknarema nosia zana 3'a za me'ne. Zmamuma nosia zana 4'a za me'neankino,

¹⁶e'i anazantamina, fri vahe kumaki, venema mase a'mo'ma mofavrema nontea naravo aki, tima anihuma nehia hagege mopagi, ke'onke zama tefananema nehia tevemofonena zamura nosie.

¹⁷Nefama negeno azanava kema hunenteno, nererama kefenkami atresnia vahe'mofo avurga, kotkoti nama zgamo'za ana avurga ani kasonepesageno, tumpa namamo'za avufga nevgaregahaze.

¹⁸Nagritera 3'a zamo ruzahukna zana megeno, antahi ama'ma nosua zana 4'a zana me'ne.

¹⁹E'i anazana ina kante tumpamo'a monafina hareno nevie, ina kante osifavemo'a have agofetura regraroheno vanoa nehie. Ina kante ventemo'a, tusi'a hagerimpina vano nehie. Hagi na'a hu'nea zanku venenemo'za, vene omase akura zamavenesie.

²⁰Savri a'mofo avu'avamo'a amanahu hu'ne, venema maseteno'a, ne'za neteno agiteti eri ho'mu hiankna nehuno, kefo zana osu'noe nehie.

²¹3'a zamo ama mopamofona azeri tore nehanigeno, 4'a zamo rga oregosie.

²²E'i kazokzo eri'za ne'mo'ma kini mani'zane, neginagi antahizane vahe'mo'za nezama nezamuma hu'zane,

²³ave'sinontaza a'mo'ma ve'ma eri'zane, kazokzo eri'za a'mo'ma kva'ama maninesia a'mofo ve'ama rehanareno manizamo'a, ama mopa azeri tore nehie.

²⁴Ama'na mopafina 4'a onensa zgaramina mani'nazanagi, knare antintahimo'a, zamagripina avitene.