Proveps-Knare Nomaniza 2:7-21

⁷Fatgo vahe'mofona knare antahiza ante avitenenteno, makazampima mani fatgoma huno mania vahe'mofona, Agra hanko zamigna nehie.

⁸Na'ankure Agrake fatgo vahe'mokizmia kama vano hu'zazmifina kegva nehuno, zamagu tumoteti hu'za amage'ma antaza nagara kavu'za zamifina zamagu nevazie.

⁹Ana nehunka fatgo avu'avazane, fatgo huno ke refkohu avu'ava ene, maka vahe'ma mago avamente avu'avama hunte'zana antahi ankeregahane.

¹⁰Na'ankure knare antahintahimo kagu'afi unefrenigeno, antahi'zamo'a, kazeri muse hugahie.

¹¹Knare antahizamo'a kva hugante'nenigeno, ama' antahintahimo'a kaguvazigahie.

¹²Knare antahizamo'a kefo avu'avazama nehu'za, akrehe krehe zmageruma neraza vahepintira, kaza huno kagu vazigahie.

¹³Iza'o fatgo avu'avamofo kama atremo'a, hani avu'avamofo kampi nevie.

¹⁴Iza'o knare osu avu'avama musema huno nehuno, akrehe krehe kefo avu'avazankuma muse nehimo'a,

¹⁵kama vu'zama'amo fatgo osu'neankino, havige vahe manine.

¹⁶Arumofo a'mo monko'za huno vano nehania a'mo, nagrane eno huno kazeri savri hu'naku hanianagi, ana knare antahintahi'zamo'a kahokeno kaguvazigahie.

¹⁷Ana a'mo nevena netreno, kahefazniare Anumzamofo avure'ma huhagerafina'a huvempa kea amefi hunemie.

¹⁸Na'ankure ana a'mofo nompima ufre'sanana, fri vahe'mokizmi kumate vu'nea kampi vugahane.

¹⁹Agrite'ma vimo'a eteno omeno, knare asimu eri kana onkegahie.

²⁰E'ina hu'negu knare vahe'mo'ma nevia kante nevunka, fatgo avu'avama nehia vahe'mofo kante vugahane.

²¹Na'ankure hazenkezmi omane vahe'mo'za ana moparera mni'nesage'za, makazampima mani fatgoma nehaza vahe'mo'za ana mopare manigahaze.