Proveps-Knare Nomaniza 28:9-28

⁹Kasegema antahizankuma amagena hunemia vahe'mofonena, Ra Anumzamo'a agri nunamuma antahizankura agotenente.

¹⁰Iza'o fatgo vahe'ma avreno kefo avu'avama hu kante'ma vanimo'a, agra'a asentenesia keri ramigahie. Hianagi tamagema huno manisimo'a, knare'za erisanti haregahie.

¹¹Feno vahe'mo'a agra'aguma antahiana ama' antahizane vahe mani'noe huno hugahianagi, zamunte omane ama' antahizane vahe'mo'za, amane agrira age'za antahiza hugahaze.

¹²Fatgo vahe'mo'ma rankuma'mofoma kegvama higeno'a, mika ve'amo'a rimpa fru higeno, tusi muse nehaze. Hianagi kefo vahe'mo'ma kegvama higeno'a, mika vahe'mo'a franekie.

¹³Iza'o kumi'ama framakinimo'a, nomanizama'afina knarera osugahie. Hianagi kumi'ama hu ama nehuno, atreno arukrahe huno esimofona, Anumzamo'a asunku hunteno azeri so'e huntegahie.

¹⁴Maka knama Ra Anumzamofonku'ma koro hunteno agorgama mani vahe'mo'a, muse hugahie. Hianagi izano agu'amo'ma hanavema atisimo'a, hazenke erigahie.

¹⁵Kefo avu'avama nehia kva vahe'mo'a, zamunte'ma omane vahe'mokizmia, laionimo vahe aheno nenaku krafa hiankna nehigeno, beamo'ma vahe'ma aheno nenaku arotago nehianka nehie.

¹⁶Vahe'amofoma knama zami kva ne'mofona, ama' antahizana agripina omanene. Hianagi havigema huno fatgo osu kantetima fenoma erizanku'ma avesrama huntesia kva ne'mo'a, zazate manino vugahie.

¹⁷Mago vahe'ma ahefri'nesia ne'moma, vahe'ma ahe fri'nesia antahintahimo'ma knama neminkeno, nontema mani so'e osu vanoma nehina, aza osu atrenkeno frino.

¹⁸Tamage avu'ava huno manizamo'a, hazenkefintira kagu vazigahie. Hianagi iza'o mani fatgoma hunoma omanisimo'a, ame huno traka hugahie.

¹⁹Hanavema atino erizama mopafima erisimofona, ne'zama'amo'a avitegahie. Hianagi iza'o agafa'ama omanezante'ma avaririsimo'a, amunte omane vahe manigahie.

²⁰Tamagema huno hugahue nehiazama fatgo hunoma nehia vahe'mo'a, rama'a asomu erigahie. Hianagi iza'o ame'ama huno feno vahe'ma maninaku'ma hanimo'a, hazenkefi ufregahie.

²¹Magomofo kazigama nemanino magomofoma atrezamo'a, knarera osu'ne. Hianagi mago'a vahe'mo'za breti ankra'are, kumi avu'avaza eri fore hugahaze.

²²Agraguke'ma antahi' vahe'mo'a, ame' huno feno vahe'ma manizanku agu'agesa nentahie. Hianagi henkama amunte omnesia zankura, keno antahino nosie.

²³Vahe'ma azeri fatgo hunaku azeri koneria ne'mo'a, vahe'mofoma masavenkema huzamante nera agatereneankino, henka rama'a vahe'mo'za agrikuke hugahaze.

²⁴Iza'o nerera nefa zama kumzafama neseno kumira nosue nehimo'a, agra mikazama eri havizama nehia vahe'ene tragonete.

²⁵Agraguke'ma antahi vahe'mo'a, ha' azeri onetie. Hianagi Ra Anumzamofonte'ma amentinti nehanimo'a, nomanizama'afina mani knare hugahie.

²⁶Iza'o agra'a antahizanku'ma knare hu'neankina amne hugahuema hanimo'a, neginagi vahe kna nehie. Hianagi iza'o ama' antahizampima vanimo'a, knazana agateregahie.

²⁷Iza'o amunte omane vahe'ma amisimo'a, mago zankura upara osugahie. Hianagi iza'o ozamage vahe kna nehuno zamaza osanimo'a, rama'a kazusifi manigahie.

²⁸Kefo vahe'mozama kvama maniza kegvama hzageno'a, mika vahe'mo'za fra'nekize. Hianagi ana kefo kva vahe'zgama frizage'za, fatgo vahe'mo'za ome rama'a nehaze.