Proveps-Knare Nomaniza 27:3-18

³Havemo'a kna higeno, kasepamo'a tusi'a knanentake hu'neanagi, neginagi vahe'mo'zama nehaza zamavu'zmavamo'a, ana tarega zana agatereno tusi'a knanentake hu'ne.

⁴Rimpama ahe'zamo'a havizantfa higeno, asivazi zamo'a ti hageno eankna hugahianagi vahe'mofo zantema negeno arimpa haviza hu'zamo'a, tusia havizantfa hu'ne.

⁵Havi avu'avama hanigenkama amate huama huntenka azeri fatgo'ma hu'zamo'a, frakinkama avesima nentenka azeri fatgoma osanana zana agaterene.

⁶Knampa kamoma kazeri fatgo hukuma katama kami'zamo'a, ha' vahekamo regavatga huno kagi'ma antakoma hania avu'avara agaterene.

⁷Amu'ma hu'nesimo'a, tumemofo rima'a one atregahie. Hianagi agazanku'ma nehania vahe'mofona aka hu'nesia nezamo'agi, agitera haga hugahie.

⁸Nonkuma zamire'ma maniso'e osu vahe'mo'za, nmamo'zama nozamire manirava osu kanke kankema hazankna nehaze.

⁹Kavesima kanteno kavumroma ante'zamo'a, mnanentake masavemo'ene knare mnavovo zamo mnaviankna huno rone'amofo agu'a azeri muse hugahie.

¹⁰Roneka'ane negafa rone'amofona kamefira huozamio. Hazenkema e'nerisunka kazama hinogura negafu nontega ovuo. Tava'onkarema nemanisimofo nontega vu'zamo'a, afete'ma mani'nenia nagafu nontegama vu'zana ageterene.

¹¹Mofavre'nimoke, ama' antahiza e'nerigeno nagu'amo'a muse nehina, ana zamo'a knama namiza huhaviza hunenantaza vahera kenona zamia huzamantegahie.

¹²Knare antahi'zama me'nesia vahe'mo'a hazenkema agrite'ma eku'ma haniazana ko negeno, mani'ganenigeno agateregahie. Hianagi knare antahi'zama omane vahe'mo'a, avua onkeno ana hazenkefina vuno ufregahie.

¹³Zamagenka antahinkama osu'nesana vahe'mo'za nofi'ma kagripinti hugahue hanagenka, amanea ozaminka nakre kuzmia avame zama'a erinege'za, ana nofima hu'nesaza zana eme vakanegahie.

¹⁴Mago ne'mo'ma nanterama'afima kezatino, knare kne hunoma haniana, vahe'ma sifna aheankna hugahie.

¹⁵Ke fra nehuno kema huvavama nehia a'mo'a, nomo trovari huvava hiankna nehie.

¹⁶E'ina hu kna a'nema zamazeri ante fatgohu kema zamasamia zamo'a, zahoma azeriankna nehuno, masave fre'nea azanteti azerigeno arugraru vaziankna hugahie.

¹⁷Aeniretima, aenima kne'agonama nehiankna huno, vahe'mo'a, vahe'mofo antahintahia azeri fatgo hugahie.

¹⁸Fiki zafama kegva hanimo'a, raga'a tagino negahie. Hagi iza'o kva'amofoma kegva huntesimo'a, ra agi agra erigahie.