Proveps-Knare Nomaniza 27:21-27

²¹Koline, silvama azeri agruma hunakura, tusi'a tevefi kre'za negazanagi, vahe'mofoma reheno negeana ragima amizanteti reheno nege.

²²Neginagi vahe'mofona neginagi avu'ava atresiegura, havereti witima refuzafupeno hona'a hareankna hunka zmahegahananagi, ana neginagi zamavu'zamavama nehaza zampintira, zamazeri otregahane.

²³Memene, sipisipi afukamozama nemaniza nomniza zamia rezagnenka ke so'e hunka negenka, kagu'areti hunka kegva huzamanto.

²⁴Na'ankure, fenozamo'a mevava osanigeno, ragima erizamo'a mago naga nofitera meno ovugahie.

²⁵Trazama akafri atresigenoma kasefa hagesigeno agonaregati trazana erinoma ufresigeno'a,

²⁶sipisipi afu'mo'zane meme afumo'za nenesageno, sipisipi afumofona azoka'aretira kukena hatino nentanino, meme afura mopama mizasega'are zgorera atreno zagoa erigahie.

²⁷Hagi meme afumofo ami rima'a, rama'a me'nenkeno agrane noma'afima nemaniza naga'amo'zane nenesageno, kazokzo eri'za mofane'amo'za nesazama'anena megahie.