Proveps-Knare Nomaniza 24:8-25

⁸Kefo avu'avazama hu antahizama retro'ma nehaza vahe'mokizmigura, hazenke vahere hu'za nehaze.

⁹Neginagi avu'avama hu'zama retro'ma hanazana, kumi nehaze. Vahe'ma huhavizama hunezmantea vahe'mofona, vahe'mo'za zamavesra hu'za zamagote'nentaze.

¹⁰Knazampima unefrenka hanavema otisankeno'a, hanaveka'a omanegosie.

¹¹Havigema hu'za zmahe frinaku'ma hanaza vahera, zamaza huta zamavreho. Hagi zamahe frinaku hanaza vahera, zamaza huta zamavreho.

¹²Antahi'nesunka ontahi'noe hunka havigea osuo. Na'ankure Anumzamo'a kagu'a kageno antahino nehuno, kagu'a kegva hunegantea ne'mo'a, kagu'a kageno antahino osugahie hunka osuo. Miko vahe'mokizmia zamagrama hu'nesaza zmavu'zmavate anteno mizana zamamigahie.

¹³Mofavre'nimoka tume rima'a no, na'ankure knare hu'neankino, kagitera haga hugahie.

¹⁴E'i anahukna huno, ama' antahizamo'a kagu'afina haga hugahie. Hagi hakenkama erifore'ma hanankeno'a, henkama erigahue hunka amuhama nehana zamo'a, amnezanknara osugahie.

¹⁵Kefo vahe'moka fatgo vahe'mozama nemaniza nontera, zmazeri haviza hunakura kva hunka omanio. Hagi fatgo vahe'mo'za nemaniza kumara eri havizana osuo.

¹⁶Na'ankure fatgo vahe'mo'za, 7ni'a zupa evuramiga hazanagi, ete otigahaze. Hianagi kefo avu'avama nehaza vahetera, mago hazenkema esuno'a, eme zamazeri haviza hugahie.

¹⁷Ha'ma renegantesaza vahe'ma evuramisagenka, musena osuo. Hagi tanafama hanaza zankura, musena osuo.

¹⁸Na'ankure Ra Anumzamo'a ana'ma hanankeno'a, negageno musena hunoganteno arimpahe zama'a anamofontetira eritregahie.

¹⁹Kefo vahe'mofo avu'avakura korera hunka antahintahi hakare nosunka, ana havi zamavu zamavakura kegasanea osuo.

²⁰Na'ankure kefo zamavu'zama'ene vahe'mokizmia, henkama knare huzama mani' mani'zana omnesige'za, lamu tavi'mo asu hiankna hugahaze.

²¹Mofavre'nimoke, Ra Anumzamofone kinimofonena koro huneznantenka znagorga nemaninka, ha'ma reznantesaza vahe'enena magopina tragoteta omaniho.

²²Na'ankure e'inahu vahetera, tusi'a hazenke zamo ame huno egahie. Ra Anumzamo'ene Kini ne'mo enema zamisaza knazana, mago'mo'e huno ontahitfa hugahie.

²³Ama' antahizama eri'naza vahe'mo'za amanahu ke hugahaze. Nanekema trate refkoma hanuza magomofonkukera osugahaze.

²⁴Iza'o kefozama hu'nesia neku'ma, kefozana osune hunoma hanige'za, rama'a vahe'mo'za anagema hania ne'kura, huhaviza hunentesageno, kokankoka vahe'mo'za antahi haviza huntegahaze.

²⁵Hu'neanagi iza'zo kefoza hu'nesia neku'ma, kefoza hu'ne huzama huamama hanimo'a, rama'a asomu erino rama'aza antegahie.