Proveps-Knare Nomaniza 21:8-15

⁸Hazenke zamima me'nea vahe'mo'za mani fatgo hu'za nomanize. Hianagi hazenke zamima omane vahe'moza fatgo avu'avate nemanize.

⁹Fra vazivava a'ene mago nompi omanino, agraku'ma nomofo fegu'a mani'zamo'a, knare hu'ne.

¹⁰Kefo avu'avama nehaza vahe'moza, kefo zama huzankuke zamavenesie. Hagi tava'ozmirema nemaniza vahe'ra zamazeri haviza nehaze.

¹¹Vahe'ma huhaviza'ma hu vahe'ma knoma amiza azeri fatgoma hazageno'a, antahi ama osu vahe'moza negeza ama' antahi'zana erigahaze. Hianagi knare antahizama eri'nesaza vahe'mo'za zamazeri fatgohu kema zamasamisage'za mago'ene antahi'za erigahaze.

¹²Ra Anumzamo'a fatgo hu'neankino, kefo vahe'mo'ma noma'afima hia avu'ava'zana keno antahino nehiankino, ana vahera zamazeri haviza hugahie.

¹³Mago vahe'mo'ma amunte omane vahe'mofo kezanke'ma antahi omisimofona, agrama mago zanku'ma upama hu'neno kezatisige'za antahi omigahaze.

¹⁴Rimpama hegante'nesia vahe'ma oku'ama musezama amizamo'a arimpa ahegante'nesia zana eri fru hugahane.

¹⁵Vahe'mo'ma fatgo huno refako hu avu'avama hanigeno'a, fatgo vahe'mo'za muse hugahaze. Hianagi kefo avu'avama nehaza vahe'mo'za, tusi koro hugahaze.