Proveps-Knare Nomaniza 21:14-30

¹⁴Rimpama hegante'nesia vahe'ma oku'ama musezama amizamo'a arimpa ahegante'nesia zana eri fru hugahane.

¹⁵Vahe'mo'ma fatgo huno refako hu avu'avama hanigeno'a, fatgo vahe'mo'za muse hugahaze. Hianagi kefo avu'avama nehaza vahe'mo'za, tusi koro hugahaze.

¹⁶Mago'mo'ma antahi ama'ma hu antahizamofo kama atreno havifima vanimo'a, frino ko'ma fri'naza vahe'ene umanigahie.

¹⁷Knare kave neneno, tima neno muse zanku'ma mika zupama avesivava hanimo'a, zgo'amo'a vgaresigeno amunte omane vahe manigahie.

¹⁸Fatgo avu'avama nehaza vahetema hazenkema esiana, kefo avu'avama nehaza vahe'mo'za zamagri nona eri'za ana hazenkea erigahaze. Hagi hazenke vahe'mo'za fatgo vahe'mofo nona eriza knazana erigahaze.

¹⁹Mago ne'moma kehakare nehuno, rimpa hevava nehania a'amofoma atreno ka'ma kopima umanisiana knare hugahie.

²⁰Ama' antahi'zama eri'nesia ne'mo'a, knare feno zantamine olivi masavena noma'afina erivitegahie. Hianagi neginagi antahizane vahe'mo'za, mika fenozazmia atre vganeraze.

²¹Mago vahe'mo'ma fatgo avu'ava ene avesima ante avu'ava'ma hankavetino avaririsimo'a, knare nomani'zanki, fatgo avu'ava'ene ra agine erigahie.

²²Ama' antahi'zane ne'mo'a, hanave vahe'mokizmi rankumara ha' huzamanteno e'nerino, hanave vihugu'ma amuha'ma hunemiza vihua tapage hutregahie.

²³Iza'o kema hu'zampima agi'ene agnefu'nanema kvama hanimo'a, hazenkea e'origahie.

²⁴Vahe'ma huhavizama huzamante vahe'mo'a, avufga ra nehuno, vahera zamage fenkami netreno, agra'a avufga erisga hu'zanke nehie.

²⁵Eri'za e'ori feru vahe'mo'a mika zama eri'zankura avesi'avesi nehuno, frigahie. Na'ankure agra azana eri avako huno, erizana e'orine.

²⁶Feru ne'mo'a mika'zama eri'zankura antahi'vava nehie. Hianagi fatgo ne'mo'a agra'agura ontahino, mika feno'zana vahera nezamie.

²⁷Kefo avu'ava ene vahe'mo'ma kresramnama nevia zankura, Ra Anumzamo'a agoteno avesra hunenteankino, kefo zamagu'zamage'saretima eri'za aza vahera mago'ane agatereno avesra hunezamante.

²⁸Keagama refako hu tratema havigema huno hu ama'ma huntesimo'a, frigahie. Hianagi tamage kema hanimofona, ana agenke'amo'a mevava huno vugahie.

²⁹Kefo avu'avama hu vahe'mo'a, havige huno nagra knare vahe mani'noe nehie. Hianagi fatgo vahe'mo'za zamagesa antahi so'e hute'za kana nevaze.

³⁰Ama' antahi'zana eri'nenka, antahi ama'ma hu antahizana erigahananagi, Ra Anumzamofoma ha'ma rente'sanana ana antahi zankamo'a amne zankna hugahie.