Proveps-Knare Nomaniza 16:5-29

⁵Ra Anumzamo'a zmavufga ra nehaza vahekura, avesra huzmanteno agotenezmante. Hagi zamavufara hanaza vahe'mo'za, knazampi manigahaze.

⁶Tamage huta Ra Anumzamofo avesinteta mani fatgo huta manisunkeno'a, Ra Anumzamo'a kumitia eritregahie. Ra Anumzamofonku'ma kore hunteta Agri agorga manisunazamo, kefo zampintira tazeri amane hugahie.

⁷Ra Anumzamo'ma musema nehia kantema tavutva'ma hanunkeno'a, ha' vahetimo'zanena zamarimpa fru hurantegahaze.

⁸Fatgo manizane maninenka osi'a fenoma ante'snamo'a, havi kampinti rama'a fenoma ante'sana zana agaterene.

⁹Ana hugahune huta antahintahia retro hugahunanagi, Ra Anumzamo Agrake makazama hanuna kana erinte fatgo hugahie.

¹⁰Kini vahe'mo'za Anumzamo'ma e'ina hihoma huno zamia antahizanteti kea nehaze. Hagi vahe'ma refakoma hanu'za, fatgo hu'za vahera refako hiho.

¹¹Fatgoma huno makazama refko hu'zana, Ra Anumzamofontegati ne-e. Hagi fatgoma huno makazama kna'amoma hu'nea avamente'ma refkoma huzanku avenesie.

¹²Kini vahe'mofona kefo avu'avazankura agoteno, avesra nehie. Na'ankure kini trama me'neana, fatgo avu'avamofo agofetu me'ne.

¹³Kini vahe'mo'za fatgo vahemofo kegu musena nehu'za, tamage keagama nehia vaheku zamavesinezamantaze.

¹⁴Kini ne'mofo rimpa aka'zamo'a frigahane naneke me'ne. Hianagi knare antahi'zane ne'mo'a, kini ne'mofona rimpa azeri fru hugahie.

¹⁵Kini ne'mofo avugosamo'ma kiza avu'avama haniana, kasimu erinka manigahane huno nehie. Ana avu'avamo'a, mona hampomo ko erino eramigeno, ne'zamo afureankna nehie.

¹⁶Knare antahi'zama eri'zamo'a golia agateregeno, ama' antahizama avesinteno erizamo'a, silva agatere'neankino hentofaza hu'ne.

¹⁷Fatgo vahe'mofo kamo'a, ranka me'nege'za, kefo avu'avazamofona azeri agateregahaze. Iza'o kva hu'neno ana kama avaririmo'a, agra'a agu'nevazie.

¹⁸Kavufga rahu zamo'a, kazeri haviza hugahie. Kagra kavufga husgama hu'zamo'a, kazeri tnafakofa hugahie.

¹⁹Akoheno anteramino amunte omane vahe enema manizamo'a, avufga rahu vahemo ha'pinti feno eri'neaza refko hu'zana agatere'ne.

²⁰Iza'o avumro antesaza kema avaririsimo'a, hakare'zama hanifina knare hugahie. Ra Anumzamofontema amentinti'ma hanimofona, asomu huntegahie.

²¹Antahi amama haza vaheku, ama' antahizane vahere huza hugahaze. Knare kema hania nanekemo, vahe'mofona avare agrarega atregahie.

²²Ama' antahintahima eri'naza vahe'mofontera ana ama' antahizamo'a asimu ami kampu'i tinkna hu'ne. Hianagi neginagi avu'avazamo'a, neginagi avu'avama haza vahetera, nona'a knaza nezamie.

²³Ama' antahizane ne'mofo agu'amo azeriante fatgo higeno, mago'ane vahe'ma agu'ama azeri rukrahe hu kea agipintira atineramie.

²⁴So'e kema hu'zamo'a tumemofo rima'agna hu'neankino, vahe'mofo agu'amemofontera haga higeno, zaferinamofona azeri so'e nehie.

²⁵Mago'a vahe'mo'za knare kante nevune nahazanagi, anama nevaza kamofo atuparega friza me'ne.

²⁶Eri'zama e'neriza vahe'mo'za antahi'naze, eri'zama zamu'nasisi hu'za e'orisanu'za ne'zana onegahazankiza, zmagamatezamo hige'za, eri'zana e'nerize.

²⁷Kefo vahe'mo'za, kefozama eri fore huzanku nehakraze. Ke'zmimo'a afe tevemo te'osa hiankna huno, vahe'mokizmia zamazeri haviza nehie.

²⁸Akrehe akrehe zmageru'ene vahe'mo'za, vahe'mokizmi amunompina kea erintage'za ha' fra nehaze. Vahe'mofo amefi agenke'ma huzamo knare arone'a, azeri netane.

²⁹Ha'framahu ne'mo'a, tava'oma'arema nemanimofona revatga huno avreno havi kante nevie.