Proveps-Knare Nomaniza 14:1-22

¹Knare antahizane a'mo'a noma'a erise higeno, naga'amo'a so'e nehie. Hianagi neginagi a'mo'a, noma'ane naga'anena eri haviza nehie.

²Fatgo avu'avazama nevaririmofona, Ra Anumzamofo kore'zamo agu'afina me'ne. Hianagi iza'o kefo avu'avama nehimo'a Ra Anumzamofona korera hunonte.

³Neginagi vahe'moma kema hiankemo'a, agrazante kano eri agumpi nente. Hianagi fatgo vahe'mofo kemo'a, agu'vazigeno knare huno nemanie.

⁴Bulimakao omani'nea afu nompina avusese nehie. Hianagi hanave bulimakamo'a rama'a ne'za erifore nehie.

⁵Tamage huno kema hu ne'mo'ma, keagarema otinea ne'ma, aza huno huama haniana, tamage hugahie. Hianagi havige'ma hu ne'mo'a keagarema otinea nema kema aza hunoma haniana havige hugahie.

⁶Hagi kiza zokago kehu vahe'mo'ma, knare antahizanku'ma hake'suno'a, keno eri fore osugahie. Hianagi ama' antahizane vahe'mo'a, fru huno antahizana erigahie.

⁷Knare antahizama omane vahepintira, mani agetaginka manio, na'ankure knare antahizana e'origahane.

⁸Knare antahi'zane vahe'mo'a kama vania kana antahi ani' hu'neno vugahie. Hianagi neginagi vahe'mo'za, zamagrazmi rezmatga nehaze.

⁹Neginagi vahe'mo'za kumimofo nona'ama erizankura, hu kiza zokago nehaze. Hianagi fatgo avu'ava'ene vahepina, antahiami' avu'avazana me'ne.

¹⁰Mago'mago vahe'mo, agria'a rimpa aka'zana antahino keno nehie. Hagi mago'mo'e huno rumofo musezana mika'a erinte amara osugahie.

¹¹Kefo vahemofo nomo'a, haviza hugahie. Hianagi fatgo vahemofo seli nomo'a, hanavetino megahie.

¹²Mago kamo'a vahe avurera knare hugahianagi, avaririno atuparega vaniana fri'za me'ne.

¹³Musema huzampinena rimpa akazana me'ne. Hagi musema hu'zamo'a vgamaresigeno'a, asuragiza egahie.

¹⁴Zmentinti osu vahe'mo'za zamagrama hu'nesaza zmavu'zmava zante, mizana erigahaze. Hagi knare vahe'mo'a agra'a, hu'nesia avu'ava zante, mizana erigahie.

¹⁵Osia antahintahima erinaza vahe'mo'za, maka zankura zamentinti nehaze. Hianagi knare antahizane vahe'mo'a, kama vu zama'afina kva nehie.

¹⁶Knare antahizane vahe'mo'a kva huso'e hu'neno, kefozana agatenere. Hianagi neginagi vahe'mo'a kva huso'e osuno, makazana amane hugahue huno nehie.

¹⁷Ame huno rimpama ahe vahe'mo'a, neginagi avu'ava nehie. Hagi kefozama hu antahintahima eri fore'ma nehia vahera, avesra hunentaze.

¹⁸Osi'a antahintahine vahe'mo'za, neginagi avu'avaza erisantiharegahaze. Hianagi makazama ankere'za hu vahe'mo'za, kini fetori anteankna huno antahizana erigahaze.

¹⁹Iza'zo kefo zamavu'zmava nehanamo'za knare'zama nehanaza vahe zamavuga zamarena regahaze. Havi zama nehamo'za fatgo vahe'mokizmi kegina kafante zamarena ome reza husga huzmantegahaze.

²⁰Amunte'ma omne'simofona, knampa'amo enena avesiontegahie. Hianagi feno vahe'ma manisimofona, rama'a vahe'mo'za knampa'a manigahaze.

²¹Inamo'o tava'oma'arema maninesimofoma kefenkami netreno knarema huontesimo'a, kumi hugahie. Hianagi iza'o amunte omane vahe'ma knarema huntesimofona, Anumzamo'a asomu huntegahie.

²²Havi avu'avama huzamofo kema retroma hanaza vahe'mo'za, havi kantera novazafi? Hianagi iza'zo knare avu'avama huzamofo kema retroma hazamo'za, mani fatgoma huno manizane vga'ore avesizana ke'za erigahaze.