Proveps-Knare Nomaniza 13:8-17

⁸Feno vahe'mo'za nomaniza'zmima eri havizama huzankura, miza hu'za manigahaze. Hianagi zamunte'ma omane vahe'mofona, mago vahe'mo'a azeri korera osugahie.

⁹Fatgo vahe'mokizmi lamu tavimo'a, ru masa nehige'za, muse nehaze. Hianagi kefo zamavu'zamavama nehaza vahe'mokizmi lamu tavimo'a, asu nehie.

¹⁰Avufga ra huno vahe'mofo agorga omani avu'avazamo'a, ha' fra hu'za avreno ne-e. Hianagi avumro kema antahino amagema ante vahe'pina, knare antahizamo'a megahie.

¹¹Revatga hunka havige kantetima eri'sana zgomo'a, ame huno fanane hugahie. Hianagi eri'zama erino, osia eri atruma hute hutema himo'a, rama'a eri atru hugahie.

¹²Vahe'mo'za fore hugahie huza amuha nehaza zamo'ma fore'ma osanige'za, zmagu'amo'a haviza hugahie. Hianagi ana zamo'ma e'ama'ma hania zamo'a, asimu ami zafagna hugahie.

¹³Avumroma antesia kemofoma zokagoma antesimo'a, agra'a hazenkefi mani'noe huno hugahie. Hianagi kasegema asaminia kemofo agorga'ama maninimo'a, nomanizama'afina knare hugahie.

¹⁴Ama' antahizane vahe'mo rempima hugamisia zamo'a, asimu ami ti kapui hanatiankna hu'neankino, iza'o ana kema antahimofona, frizamofo krifufintira agatenere.

¹⁵Knare hu'za antahi amama haza vahe'mokizmia, vahe'mo'za zamavesi nezamantaze. Hianagi hazenke vahe'mokizmi zmavu'zmavamo'a, hanavetino haviza hu'ne.

¹⁶Maka zamofo ankereno hu vahe'mo'a agesa antahiteno, maka zana nehie. Hianagi neginagi antahintahine vahe'mo'za, zamagesa ontahi neginagi zmavu'zmavaza eri ama nehaze.

¹⁷Kefo vahe'mofoma katogema huntesigeno vaniana, hazenkefi ufregahie. Hianagi iza'o tamagema huno kema hu vahe'ma, ke erino vanigu'ma katogema huntesigeno erino vaniana, vahe'mokizmia zmazeri knare hugahie.