Pris Sę Ebo Bomai Po 8:4-14

⁴Tialima, Mosesgo Genuai Bidigo po odama, te tama sę yali. Tama tigidali we bidi sisinagasali.

⁵Tama Mosesgo augwaliba walali, “Eno megi e yainogo ebo sę da, te Genuai Bidigo enabolo te sę yao po polobadu obaso ebao.”

⁶Tialima, Mosesgo Aron aga ogwa dabe dali selama, te we bidi augwali geduba dodolagaselama, tama agai augwali ąįgo paluali.

⁷Tama agai te holobo ugwa Aronba bolo gudulali. Tama agai te bobage name ugwa te Aron tabidu belali. Tama Mosesgo bobage aiyaba tagalalubo ugwa te genuai name ugwa Aronba gudulama, te welia kukulu au yai selama, te genuai ugwago te Aron tabidu soani kekalio.

⁸Tama agai te dwasianu name ugwa Arongo hagawiade kekelama, tama te Godigo homu kolesaga konebo masigi si muani, te ugwa agebele poketde muai elaluai dao.

⁹Tama agai bobage ugwa me deli te Arongo tobolude bagulama kęnani. Tama agai te dwasianu nai medal gol selama, Aron te Godigo bidi mu da olama dąį ilu, te ugwa name Arongo gesabidide ugwadu daganani. Mosesgo te sę dabe te Genuai Bidigo agabolo po wali gilama yai dao.

¹⁰Nosali Mosesgo te Godigo nai dabe dąį ilainogo te wel selama, te Godigo sel Ugwa Bede pilibadi, te be tomode elalubo nai tigidali me pilali. Tama te tiali kolesagade te nai doado bage dabe te Genuai Bidigo nai dolo da weyu, tama tiali dao.

¹¹Tama agai te wel habu selama, te nogo a naga olama, me badu nogo si sogo te altaba sąwani, te altade sę yabo doado bage me, te wę paubo moni genuai disba me agai tebolba tama tialio. Te tiali kolesagade agai te nai dabe te Genuai Bidigo nai mu da weyu dąį iliyu tiai dao.

¹²Tama agai wel ąį dwasianu te Aron toboluba gelali, te tiali kolesagade te Aron te Genuai Bidigo pris mu tiwai da olama dąį ilai dao.

¹³Nosali Mosesgo te Arongo ogwa dabe sela asama, augwaliba te holobo ugwa gudulama, tama agai te bobage name ugwa pedai te kukulu tiwai augwaliba belama, te augwali tobolude name ugwa kęnani, te Genuai Bidigo wali po tiwai gilama yai dao.

¹⁴Te silama da, tialima Mosesgo te bulmakau omai te bidi augwaligo te sęgę sela sąbo ofa yainu sela asali, te Aron aga ogwa dabe daligo te bulmakau toboluba nogo mumainao wali.