Pris Sę Ebo Bomai Po 6:8-21

⁸Genuai Bidigo Mosesbolo te tiwai po wali,

⁹“Nago te siaba tigidali ulubo ofa ebo bomai po te Aron aga ogomani dabe daliba te po walao. Augwaligo te ofa ebo nai te altaba ulama, te isigo dedubadi, te be posoboba usu nao. Te sia bogoli idubadi, te sula somainu me elamu dao.

¹⁰Nosali prisgo te pęwadage trausis te augwa wiegi yai nami ugwago nigai trausis gudama, tama te bobage tagalalubo ugwa me munama, te aga altaba pelama, te keli sao, te ili yai ofa elalubo madi, te alta pąde tǫba gealuao,” po wai dao.

¹¹“Nosali aga gudali ugwa hasegelama, te sia dali keli selama, te pesage nigali buluba sela solama, te eno gedude meda meni yai pesage me deliba muao.

¹²Tama te altade nogani sia sesemane didumainao, te munu me sula sągio. Tigidali side kigamu prisgo te sia nogonama, tama agai te ofa yabo kibu hasa dabe selama, te siago tigidali domainogo siaba ulaibao. Te deli haliga pedalubo ofa yabo kibu ili selama, tama te siaba uluyu yao.

¹³Sesemane sogo te altade sia ula idumainao. Dagego te sia sula somainogo me elamu dao,” wali.

¹⁴Te Genuai Bidigo Mosesbolo te po walima, te Israel dabeba te tiwai po omainu yali, “Te wit ulubo ofago bomai po e tiwai. Te Arongo hanigo pris me deligo te ena Genuai Bidiba te wit ulubo ofa mao, te alta pąde yao.

¹⁵Tama prisgo te dwasianu plaua te augwaligo wel muai sobadi, te ofa wiegi yai denami ilabo pauda tigidali sao,” wali. “Tama agai te tigidali te alta siaba tigidali ulao. Te dwasianu ofago te tigidali ofa dąį ilibao, te enaba augwaligo mobao. Tama eno te ofa denami odama, eno godolo homu elama, bugai homu yaibao,” wali.

¹⁶“Te plaua me badu munalubaso da, te pris dabego tuiyąo. Augwaligo te plaua selama, te yis meni yai bret nigilama, te augwaligo eno Ugwa Be mesalode tuiyąo.

¹⁷Augwaligo te plaua dali te yis dali taluama te bret ulamuo. Augwali odolali ulao, magi baso meni, te plaua te eno nai mu tama, te sęgę sela sąbo ofa tiwai, me te bidigo yali dwai sę silimainogo ebo ofa tiwai ebao. Tama eno te plaua dabe te prisba dąį ilali. Te ofa ebo naigo te augwa me badu somainogo ebo dao.

¹⁸Tama te Arongo hani pris bidi dabego te bret tumainao. Augwaligo te ebo ofade te Israel dabego enaba ofa ebo nai dabego somainao. Sesemane sesemane sogo nosali, te Arongo hani bidi dabego te ofa ebo nai me badu munalubo te augwaligo somainao. Tiali goli, te gasa bidigo diąwani ma te nai me deli te tuabo ofaba dagana sobaso da, teda te bidi ma te nai te habu mu selama elalueibao,” wali.

¹⁹Genuai Bidigo Mosesbolo te tama po wali,

²⁰“Te Arongo hani pris dabego te augwali gesi sogo mu hasia te pris sę sabo side, augwaligo te ofa me deli yao,” po wai. “Te bidi me deli augwaligo pris pedalumainogo augwaligo te ni oliv wel aga toboluba geleyu ebo side da, teda agai ofa enabolo yao. Agai te kilogram deli yai wiegi yai plaua deli sao, te wit ulubo ofa tiwai usu nama yao, te pedai me badu kigamu ofa eyu te me badu pedai te giliga dega sigulubadi yao.

²¹Agai te plaua dali ni oliv wel dali begelama, te praipende bugagia ulao. Nosali agai pepedama, te enabolo mao, Genuai Bidiba. Tama eno te ofa ebo denami odama, te eno godolo elama, bugai homu yaibao.