Pris Sę Ebo Bomai Po 4:4-34

⁴Agai te kau kibu te Godigo Ugwa Be sunumiba sela pelama, te kau kibu toboluba nogo muyu bolo elama da, nosali agai te Genuai Bidigo gedude ela mubaso da, usu dao.

⁵Tama nosali hetprisgo te kau kibu kaneme selama, te Godigo Ugwa Be tomoba pobaso usu dao.

⁶Te agai nogo tų deli te kanemeba munama, te danide elalubo kaneme te Tedali Gasagi Yai Mu Be Habuba te tede walobo genuai nami ugwa pąba sągąyao, tama Genuai Bidigo te tiwai są ebo sueibao. Agai te tama tiwai sę ebo te a naga olama si sogo usu nama tama yao.

⁷Tama aga te wiegi yai denami ebo hano holobo ofa ebo alta te Genuai Bidigo geduba Ugwa Be tomoba pao. Tama agai te kau kibu kaneme meba te kau kibu gąų kom me si me si tiwai alta me si me si dage badu teba mumainao. Te kau kibu kaneme me badu tigidali elalubaso da, te agai Ugwa Be sunumi badu alta buluba sela solama, te augwaligo ofa ulubo madi, te alta ulubo dogwa saliba te kaneme gelao,” wali.

⁸“Nosali agai te bulmakau haligade elalubo ili delegabe tigidali sobadi yao,

⁹te namba tu lewa dali te ili dabe me, te namba wan lewago wiegi yai te dali sao. Agai te namba wan lewa me namba tu lewa si dali sabo usu dao.

¹⁰Tama prisgo te kibu ili dabe te ofa ulubo altaba ulama, te isigo tigidali dela silama, te keli hogomu naga elalueibao. Agai te bulmakau ili ulama, te deli haliga pedalumainogo ebo tiwai tobage ofa emainao,” wai.

¹¹“Tiali goli agai te bulmakau tigi wali me kibu mi badi, te tobolu, me sągą si, me nogo si, te haliga tomode ili delegabe me selama,

¹²tama bulu badu peyu, te augwa te keli sągi soabo pesageba sela pao. Te pesage te Godigo gedude magi meda meni yai wiegi yai elalubao. Tama agai te sia nogonama, te kibu tigidali te isiba ulama, dela silama, te keli naga elalumainogo yao,” wali.

¹³Genuai Bidigo Mosesbolo walama, te Israel dabeba te tiwai po omainogo wai, “Te Israel we bidi tigidali te homu kone bugagia me palisąma, te augwaligo Genuai Bidigo bomai po bolobaso da, teda augwaligo sęgę sali dao. Te augwaligo sęgę sali te augwaligo me konesiąwai goli, augwa te yali kolesaga augwa dagede te sęgę sai dao.

¹⁴Te nosali augwa te yali sęgę konebaso da, teda augwa te ogwa bidi bulmakau me deli selama, augwa te sęgę sela sąmainogo ofa iyąo. Augwaligo te ofa te Godigo Ugwa Be sunumiba sela pomainu yao.

¹⁵Tama te Genuai Bidigo gedude te Israel hetman tobolu bidi dabego nogo te bulmakau toboluba munama, te nosali augwaligo te bulmakau ela mumainao.

¹⁶Tama hetprisgo te bulmakau kaneme meba te Ugwa Be tomoba sela pao.

¹⁷Tama agai nogo dani deli te kanemeba munama, tama te nogo danide elalubo kaneme te pąde elalubo genuai nami ugwa te Tedali Gasagi Yai Mu Be Habu seselalubo teba sąbaso, te Genuai Bidigo sueibao. Agai te a naga olama, si sogo te tama sę ebaso, usu dao.

¹⁸Tama agai te kau kibu kaneme meba te me si me si wali kom gąų te alta wiegi yai denami hano holobo te Genuai Bidigo gedu badu mubaso, usu yaibao. Te kau kibu kaneme tigidali me badu elalubadi ebaso da, agai te Ugwa Be sunumi bulu badu te augwaligo ofa ulubo badu sela solama, te alta aiyadu dogwali madiba gelao,” wali.

¹⁹“Nosali agai te bulmakau ili tigidali selama, te alta siaba ulao,” po wali.

²⁰“Hetprisgo te deli tigi poąį kolesaga te bulmakaude yao, te agai aga sęgę sela sąyu ofa yali bulmakaude yali kolesaga tiwai ebaso usu yaibao. Te tiwai naga hetprisgo te tigidali we bidigo sęgę sela sąbo kolesaga eyu, tama tibaso da, teda Godigo augwaligo sęgę me sela sąwaibao,” wai dao.

²¹“Nosali agai te kau kibu delage selama, te pesage bulu badu sela solama, te isiba ulao, te aga digi sęgę sela sąyu, te bulmakau ofa yali tiwai ebaso usu yaibao. Tigidali we bidigo te kau kibu ofa tama ebo, te augwa sęgę sela sąyu ebao,” wali.

²²Genuai Bidigo Mosesbolo waliyu, te Israel dabeba te tiwai po omainogo yali, “Te tobolu bidi me deligo te homu kone bugagia me palisąma, agai Genuai Bidi Godigo bomai po bolobaso da, teda sęgę saibao, te aga ebo kolesaga dagede te sęgę sobao.

²³Te nosali agai te sęgę konebaso da, teda agai te wiegi yai meme kibu omai me deli sao, te keni kenigo aga tigi me dolisąwai, te ofa yagasu selasa asao,” po wai dao.

²⁴“Te Genuai Bidigo gedude agai te meme toboluba bolo nogo munama, tama nosali agai te kibu dabe elama, te isiba ulama domainu ofa ebo pesagede te meme kibu elimainao. Te meme kibugo aga sęgę sela sąbo ofa ebo dao.

²⁵Tama prisgo nogo dani deli te meme kibu kanemeba munama, te alta kom me si me siba te dwasianu kaneme munana pao. Te elalubo kaneme yai baso da, agai selama, te alta aiyaba dogwa sali dedageba gealuao.

²⁶Tama agai te meme ili altaba ulao. Prisgo te meme kibu elama, te meme ili me te deli haliga pedalumainu ebo ofa tobage tiwai ebaso usu yaibao. Te tiwai naga prisgo te hetman tobolu bidigo sęgę sela sąbo kolesaga eyu, ofa yao, te Godigo agai sęgę sela sąmainao,” te po wai.

²⁷Te Genuai Bidigo Mosesbolo te po waliyu te Israel dabeba e tiwai po pusao wai, “Te we bidi augwali me deligo te bugagia homu konesiąma, te Genuai Bidigo bomai po bolobaso da, teda agai te sęgę sali, te aga dagede te kolesaga ebo dao.

²⁸Tialima, nosali aga homugo te sę koneagasu te aga sęgę sela sąbo ofa yaibao. Te aga pris ma tobolu bidi te meni baso da, teda agai te meme kibu so te dwai keni kenigo tigi me dolisąwai wiegi yai mu me deli selama, te ofa yabo sela pobaso usu dao.

²⁹Te agai meme kibu toboluba bolo nogo munama da, te nosali agai te siago tigidali dabo ofa ebo pesageba sela pelama, ela mubaso usu dao.

³⁰Tama prisgo nogo dani me deli te meme kanemeba munama, te dwasianu kaneme te alta gąų me si me si teba muao. Tama te kaneme meba elalubadi yaibaso da, te selama, te alta pagede aiyaba gealuao,” wai.

³¹“Tama agai te meme kibu ili tigidali te altaba ulao. Prisgo te meme ilide te deli haliga pedalubo ofa ebo tobage kolesaga tiwaigo te ofa yao. Tama agai ili te altade ulao, te Genuai Bidigo te ofa ebo denami godolo yaibao. Te tiwai naga te prisgo te bidi ma wego sęgę sela sąbo ofa ebo kolesaga ebaso da, te Godigo agai sęgę sela sąwaibao.”

³²“Te bidi me deligo aga sęgę sela sąyabo ofa yabo sipsip kibu sela asobaso da, agai te so kibu sipsip keni kenigo tigi dolisąwai wiegi yai mu sela asiyu, te usu mu dao.

³³Agai te kibu sipsip toboluba bolo nogo mumainogo elama, te nosali agai te kibu sipsip elainogo da, te isigo tigidali mu dela silibo ofa ebo pesagede elama, te ofa ebo usu dao.

³⁴Nosali prisgo nogo dani deli te sipsip kanemeba munama, tama kaneme dwasianu te alta gąų me si me si elaluboba muao. Te me badu elaluali kaneme agai selama, te ofa ebo alta dedageba gelao,” wai dao.