Pris Sę Ebo Bomai Po 27:1-24

¹Genuai Bidigo po Mosesbolo weyu,

²te Israel dabebolo te tiwai po walao wali, “Te bidi me deli aga po dąų waliyu, te aga enaba mawaibao, ma gasa bidi me we te enabolo mawaibao wai baso da, teda agai te dąų wali po usu nainogo te monego te bidi ma we hasegelainogo eyu, te mone meba pris bidiba mao,” te po wai.

³“Te we bidi dabe ma abelabo dąį ilali mone e tiwai elalubao. Te kibu be 20 dąį elama, te kibu be bidi sese sela 60 igi pali bidi, augwaligo te mone 500 kina tama monego hasegeliyu abelao.

⁴Te wego kibu be bidi sese delide dąį elama te bidi sese selaba dąį igi pali we da, te mone 300 kinago abelao.

⁵Te bidi kibu be a nagade dąį elama te kibu be bidi sese deliba usu nani bidi da, te mone 200 kinago abelao. Te we kibu be a naga dąį elama te kibu be bidi sese deliba usu nani we da, te mone 100 kinago abelao,” te po wai.

⁶“Te wai ogwago polua delidu te kibu be a naga usu nani wai da, te mone 50 kinago hasegeliyu abelao. Te wegi te polua delidu te nogo a naga kibu beba usu nani wegi da te mone 30 kinago abelao,” wali.

⁷“Te kibu be bidi sese sela 60 yali bidi, te 150 kina monego abelao. Te kibu be bidi sese sela 60 yali we da, te 100 kina monego hasegeliyu abelao,” te po wai dao.

⁸“Te tiwai mone muabo po dąų wali bidigo, te aga digi aga ma abelabo mone ma aga abagi abelabo mone me meni baso da, teda te bidi prisba pao. Te prisgo te bidigo mone aiyaba dulama, te prisgo homugo aga muabo homu ebo mone usu nama mueibao,” wali.

⁹“Te bidigo te kibu me deli ena Genuai Bidiba ofa yaibao po dąų wai baso, agai te tobage kibu dabe eno dagebolo ofa yao po wabo kibugo te ofa yao. Te dagego ofa ebo kibu tigidali te eno nai mu dao.

¹⁰Tama te bidigo te wiegi yai kibu hasegelama, te dwai kibugo ofa igio. Agai te kibu dwai hasegelama, te wiegi yai kibu ofa igio. Tialima, agai hasegelibaso da, teda te kibu si dali si te ena, Genuai Bidigo dao.

¹¹Te bidi me agai enabolo te wiegi yai isąwai kibu me deli agai enabolo ofa yabo usu meni baso da, teda agai te prisba selasa pao,” wali.

¹²“Prisgo te kibu wiegi yai yaliwe ma dwaliwe sulama, agai te mone dąį ilaibao. Tama te mone nogi tagalama, gasa mone dąį me iligio.

¹³Te bidigo te kibu ma abelabo homu ebaso da, teda agai te mone meba dali te prisgo dąį ilali mone dali sesao. Te prisgo 5 kina dąį ilibaso da, teda agai te mone 6 kinago abelao. Ma, prisgo te mone 10 kina po obaso da, agai te mone 12 kina mobaso usu dao,” wai dao.

¹⁴“Te bidi me deligo aga be ena Genuai Bidiba maiabo homu ebaso da, teda prisgo te be wiegi yai ma dwai yabowe naga suao, agai digi te bego mone dąį ilao, te prisgo dąį ilali mone me hasegeligio.

¹⁵Tama ena Genuai Bidiba te be mani bidigo, te nosali aga be ma abelabo homu ebaso da, teda agai te bego mone usu nama mayu, te gasa me badu dali daganama mao. Te prisgo te bego mone 100 kina dąį ilai baso da, teda te bidigo 120 kina mao. Agai te mone prisba menama, te aga be ma sobaso te usu dao,” wali.

¹⁶“Te bidi me deligo agai tǫ pedai enaba mobaso da, teda prisgo te nisu naga te nai wai bali te tǫde bulugowe naga te osola suao. Te augwaligo te sęgę bidi sese deli 20 kilogram bali bulabo tǫ usu yai baso da, teda te tǫgo mone 100 kina usu dao.

¹⁷Tama agai enabolo te mani tǫ te nai dabe wei ma ponabo kibu be yagasobode te hasia wabo kibu bede mobaso da, teda te mone te tiwai elalumainao, te me hasegelamo dao.

¹⁸Tialima, agai enabolo mabo tǫ te kibu be meba nosali wabo te genuai kibu be wabo sogo mobaso da, teda prisgo nisu naga kibu be elalubadi yai baso te nedao, te nai dabe wei ma ponabo kibu be nisu naga elalubo koneainogo tiao, tama agai te tǫgo mone aiyaba togaibao.

¹⁹Te tǫ enabolo te mani bidi, te aga tǫ ma abelainogo ebaso da, teda agai te monego abelemainao. Te mone prisgo 100 kina dąį ilai baso da, teda te bidigo 120 kina mao. Agai te mone prisba menama, te aga tǫ ma somainogo emainao.

²⁰Te hasia bolo agai te tǫ ena Genuai Bidiba abelesąma, tama agai te tǫ gasa bidiba mawai baso da, teda nosali aga digi ma abelainogo ebaso, usu me egobe dao.

²¹Tama te nai dabe wei ma ponobo kibu be pedalubo sogo, teda te tǫ abelali bidigo enabolo ma mao. Tama te tǫ ena tǫ sesemane sogo elalua paibao, te we bidi augwalide habu selaibao. Te eno pris augwaliba naga mawaibao,” te po walio.

²²“Te tǫ me deli bidigo abelai, te aga wąį nǫų dabego tǫ menio, agai te tǫ ena Genuai Bidiba mobaso da,

²³teda te nai dabe wei ma mabo te nisu naga kibu be elalubowe naga te prisgo neda suao. Tama agai mena tama kibu be elalubo usu nama te tǫde mone dąį ilao, te side naga dolo te bidigo te prisgo tǫba mone mao. Tama te mone da ena Genuai Bidigo nai dao.

²⁴Tialima, te nai dabe wei ma ponobo kibu bede, te tǫ sali bidigo te tǫ aga ayaba wei ponama dolo mao,” wali.