Pris Sę Ebo Bomai Po 25:3-9

³Te kibu be me sela me selade dagego te duga tǫde mena tobage nai bulao, te wain nologo dabe togolama, te gide nai sao.

⁴Tiali goli, te 7 wabo kibu be me delide dagego te tǫ toma neyu, olo elalumainao. Te kibu be dagego eno kibu be da olama, sa muao. Dagego nai me bulisąma, te ni wain nologo me togolamo dao.

⁵Te nai wit pedelama olo dali elalubaso da, teda dagego te nai wai me selama, nai mubo beba me sisinigio. Te ni wainde te age holobaso da, teda dagego te wain nigainogo me sigio. Tigidali sula tagalama elalumainao, magi baso meni, te kibu bede tǫ bugagia toma nomainao.

⁶Te kibu bede dagego tǫde nai odolali pedelali, te tuyu naga yao. Te nai sisinibo beba sisiniyu, ma wain nigibo sę me egobeo. Dage me, olo sę ebo bidi me, olo sę ebo we me, gasa sę bidi dabe me, te dage dali bidibo gasa hani we bidi dabe, duga tuiyąo.

⁷Te bulmakau, sipsip, meme dabe, te bulu uni kibu hasa dabego me tumainao,” te po wai dao.

⁸Genuai Bidigo po ma weyu, te tiwai po wali, “Te a naga me si sogo dagego te kibu be 7 te tama nedao, te kibu be bidi sese si a naga me si me si, te 49 kibu beba usu naibao.

⁹Te kibu be 49 wabo side, te 7 polua dei 10 wabo sogo, dagego bidi meba tagala palama, te duga tǫ kantri pedaiba te bu wabo nai biugel bu wagi pomainao. Te side te God eno genuai side, eno te We Bidi Augwaligo Sęgę Sela Sąyabo Side mu dao.