Pris Sę Ebo Bomai Po 23:8-42

⁸Dagego ena Genuai Bidiba te kibu me nai ula mabo ofa deli deli bubugade idubadi, te Sarere deliba usu nao. Te nogo a naga me si wabo side dage ma sisinama, lotu wao, te side dagego sę munu me elamo dao,” wali.

⁹Te Genuai Bidigo Mosesbolo te tiwai po ma wali,

¹⁰“Te Israel we bidi augwaliba te tiwai ma wao. Te dage eno mawainogo ebo tǫba bidigi pabo sogo, te nosali dagego duga gide te wit tau inawai sabo sogo da, teda te tigidali kibu bede te polasa duani wit selama, dagego te pris dabeba selasa pao.

¹¹Tama prisgo te wit duani nogode tolaluyu, te eno gedude uga eda elama, te eno dagebolo usu da waibao. Prisgo te Sabat side tudi badu nosali ofa ebaso usu dao.

¹²Tama dagego te wit ofa ebo sogo, dagego te sipsip wai kibu be deli yai ofa yao, te wiegi yai mu, te keni kenigo tigi me dolisąwai ofa yao. Te sipsip te isiba tigidali ulubo ofa yao.

¹³Dagego te wiegi yai plaua me badu dage sao, te aga sęgę 2 kilogram, te oliv wel dali taluama, te wit ulubo ofa yao. Te isiba tigidali ulama dabo ofa dali ofa ilao, eno te ofa ebo denami godolo yaibao. Tama dagego te lita deli wain selama, te ofa si dali ofa yao.

¹⁴Tialima, dagego te hasia duani wit te duga God, enaba sela asisąbadi, dagego te gide sabo gesi wit tugio. Te dagego sela aselama da, teda duga tuagameo. Dagego te wit ge disąwai nai tuao, ma duga isiba uluyu yao, ma dagego plaua nigilama, te bret ulama tuao. Dagego te ofago bomai po wali peyu, te duga wąį nosali, me nosali pedalubo bage, augwaligo me wali pomainao,” wali.

¹⁵Te Genuai Bidigo po te tiwai ma wali, “Te ena Genuai Bidiba, dagego te duani wit magasobo side te nosali badu nedebo gagalobo te Sarere a naga me si dao.

¹⁶Te 50 wabo side, te a naga olama si wali Sarere silibo si nosali badu, dagego te wit gasa gesi ofa enabolo mao.

¹⁷Te we bidi wai augwali deli delide bret si seselama, enabolo te gesi wit ofa mabo tiwai yao. Dagego te sęgę kilogram si yai plaua si te bret deli deli nigabo usu selama, te yis dali taluama ulao, te Genuai Bidi, enaba te bret ofa yao. Te prisgo nogo tolaluyu, eno gedude iba eda yao.

¹⁸Te dagego gasa nai te bret dali ofa yao. Dagego te kibu sipsip wai te kibu be deli yai a naga me si ofa yao, te ogwa bidi bulmakau me deli, te omai sipsip si sobadi te ofa yao. Dagego te kenigo aga tigi dolali kibu me sigio. Te wiegi yai kibu naga sao. Te dagego enaba te isiba tigidali domainu ulubo ofa tiwai yao, te wit me wain meba te ofa dali muao, te dagego tigidali sogo ebo tiwai yao. Te ofago wiegi yai denami ebaso, ena Genuai Bidigo, eno godolo mu ebo dao.

¹⁹Dagego te omai kibu meme me deli selama, te sęgę sela sąbo ofa yao, te kibu be deli yai omai sipsip wai si me selama, te deli haliga pedelabo ofa yao.

²⁰Prisgo te polasa tau inawai witgo nigai bret me te sipsip si selama, nogode tolaluyu, iba eda eno gedude yao, te ofa tiwai ebao. Te ofa dabe te ena nai mu elalubaso, eno te pris augwaliba mawaibao.

²¹Dagego te ofa ebo side dage sisinama, lotu wao. Dagego duga sę dabe te side me elamuo. Te duga wąį nǫų dabe te nosali nosali pedelama, te menade bidibaso, tigidaligo te bomai po sesemane wali pidubadi geao,” te po wai dao.

²²“Te dagego duga gide te wit tau inawani sabo sogo, dagego te gi sesege badu mu gagalama sigimio. Dagego te gi tomode nai sabo sogo, te me badu nai dagego ela soeibaso da, teda dage te si sogo ma pelama sigi pigio. Te elalumainogo elama, te nai meni yai bidi dabego me te gasa bulu bidi dage dali bidibo bidi, augwaligo te nai somainao. Ena Genuai Bidi, ena dagego Godigo, eno te tama po wai dao.”

²³Genuai Bidigo Mosesbolo te tiwai po wali,

²⁴“Te Israel we bidibolo te tiwai po walao. Te 7 polua dei 1, dage toma nao. Te duga genuai side me deli dao, te dagego bu wabo nai biugel bu olama, te dage sisinagaselama, lotu wao.

²⁵Tama te side dagego duga sę me elamuo. Menio. Dage te altaba pelama, enaba ofa mao,” te po wai dao.

²⁶Te Genuai Bidigo Mosesbolo wali,

²⁷“Te 7 polua dei 10de Te We Bidi Augwaligo Sęgę Sela Sąbo Genuai Side dąį ilali. Te side dagego nai tubo me wiegi yai pemene ebo sę tigidali habu selao. Te dage lotu wainogo sisinama, te ofa me deli enaba sesao.” Te po wai dao.

²⁸“Te side dagego sę me igio, magi baso meni, te side prisgo te sęgę sela sąbo ofa yaibao. Prisgo te ofa ebaso, ena God, dagego Genuai Bidi, te eno dagego sęgę tigidali sela sąwaibao.

²⁹Bidi me deligo te side nai tuali da, te aga eno we bidi hanide sela sąwaibao.

³⁰Bidi me deligo te side sę ebaso da, teda ena digi ena aga ela mueibao.

³¹Odao. Eno po ma obao, dagego te side sę me deli igio. Dagego sesemane sogo te bomai po wali piduao. Te dagego wąį nǫų nosali nosali pedelama, menade bidibaso me, augwaligo me wali pomainao,” te po wai dao.

³²“Dage te side bugagia toma nao. Te gagalobo side te dei 9 wabode gagalaibao, te giliga dega sigi pabo sogo, te dei 10 wabode te sia ge dega sigi paboba usu naibao. Te side usu nama tigidali, dage nai tubo me wiegi yai pemene tigidali ebo habu mu selao,” wali.

³³Genuai Bidigo Mosesbolo walama, Israel dabeba te po mao wali.

³⁴Agai te tiwai po wali, “Te 7 polua 15 dei wabode, te namba 1 dei te genuai side te we bidi augwaligo te dwasianu be te ni nologo selama sę ebo side elalubao, te bede bididubadi te a naga si sogo Sarere deliba usu nama, ena homu kone palao.

³⁵Te Sarere hasia wabo side, dage sisinama, lotu wao, te dagego duga sę me elamo dao.

³⁶Dagego enaba te Sarere usu nama ofa tigidali side yao. Te 8 wabo side, dage ma sisinama, lotu weyu, te dagego ofa yao. Te dei 8 wabo side da, te lotu wabo side naga dao, te dagego sę me igio,” te po wai.

³⁷“Te side dabe da te ena Genuai Bidigo dąį ilali side, te dage lotuba sisinama, ena ofa yao. Te dagego isiba tigidali ulubo ofa eyu, te wit ulubo ofa, me wain ąį gelebo, me gasa ofa me yao. Tama dagego te ofa deli deli te aga bodolu muani side dolo iyąo.

³⁸Dagego te tigidali side bodolu wali peyu, te enaba lotu weyu, toma nabo Sabat side tigidali me tiao. Dagego te ofa dabe eyu, te dagego enabolo gasa mabo nai me mao, te dąų yali po usu nubo ofa dabe, me te duga homugo digi enabolo mabo ofa me maiyąo,” wali.

³⁹“Te 7 polua 15 dei wabo side, te dagego tau yali nai sela aselama nosali, dagego te nogo a naga olama. me si wabo genuai si te osogo bidabo bede bidiyu, te ena Genuai Bidiba homu kone palao. Te hasia wabo dei me dei 8 wabo side, dage toma nabo side sę tagalama, bidao.

⁴⁰Te namba wan dei wabo side dagego wiegi yai nai mu meba dagego te tubo ni dude sao. Tama dagego te ni det nologo me te yabe hauwa elalubo ni nologo me sao. Tama dage wiegi yai pemene idubadi, te nogo a naga me si wabo siba te eno gedude tama yao, Genuai Bidi, dagego God dao.

⁴¹Tigidali kibu bede te 7 wabo poluade te dagego enaba muani genuai bodolu te 7 sogo elalueibao. Te duga wąį nǫų nosali nosali pedalubo bagego te bomai po wali pao.

⁴²Dage tigidali Israel we bidi te dwasianu tolu yabe bede te a naga me si sogo bidao.