Pris Sę Ebo Bomai Po 22:10-27

¹⁰“Bidi ma we te dage pris hanide, te augwa naga te we bidi augwaligo ena mabo ofa ebo nai tuao. Te gasa bidigo me tugio. Te pris dali osogo bidibo bidi, ma aga sę bidi, augwaligo me tugio. Te habu mu dao.

¹¹Tialima, pris me deligo abelali olo sę ebo bidi dabe, ma olo sę ebo we dabe, te augwali aga dali bidali, te augwa wai dabe, te aga idago te prisgo bede ame nani, te augwaligo da te prisgo sabo tobage nai dabe somainao.

¹²Te pris me deligo wegi te pris sę isąbo bidigo sai baso da, teda te wego eno te ofa ebo nai dabe me tulamo dao.

¹³Tialima, te wego bidi isama, te we aga olo bidibadi, ma aga bidigo sela sąnama olo bidibadi, te wai meni badi, te we aga ayago beba ma pelama, bidibadi yai baso da, teda aga te prisgo tubo nai tuao, te aga ayago tubao. Tiali goli, bidi ma we te prisgo hani isąwaigo me tugobeo. Te habu dao,” wai dao.

¹⁴“Te bidi me deli dage pris hani isąwai, te aga bugagia homu kone palisąma, te agai enabolo ofa mabo nai me badu dage tueibaso da, teda agai prisgo te nai wei ponao. Te agai a naga nai dage saibaso da, teda aga a naga me deli wei ponomainao.

¹⁵Tialima, te pris dabego bugagia tonaluao, te olo we bidi augwaligo enaba ofa mabo nai te me tugio,” te po wai dao.

¹⁶“Te dage prisgo te olo bidi me deligo tumainogo yali da, teda te bidigo dwai sę yali, tama agai te nai wei te pris dabeba wei ponao. Magi baso meni, ena Genuai Bidigo eno te ofa sa munama, te ena da weyu, habu selai dao.” Te po wali.

¹⁷Tama Genuai Bidigo Mosesbolo te tama po wali,

¹⁸“Nago te po Aronba me aga ogwa dabeba menama, te Israel we bidi tigidaliba wao. Te dage Israel bidi me deli, ma te dage dali bidibo gasa hani bidi me deli, agai te isiba tigidali ulama dabo ofa me deli sela asiyu, te agai enaba dąų wali po me deli usu nainogo, ma aga homugo digi naga sela asobaso da,

¹⁹teda agai bulmakau omai me deli, ma sipsip omai, ma meme omai ofa emainao. Tialima, dagego te keni kenigo tigi dolai kibugo ofa me elamuo. Dagego tama teyu da, eno te godolo homu me egobe dao.

²⁰Bugagia odao. Te dagego kibu tigi dwasianu dwai gana yaigo ofa ebaso da, teda eno godolo me egobeo.

²¹Te bidi me deligo ena Genuai Bidi dali deli) haliga ebo ofa mabo sogo, te agai ena dali dąų wali po usu niyu, mabo ofa yaibaso, te tagalao, te aga homugo digi ebo ofa yaibaso da, teda agai wiegi yai bulmakau ma sipsip te keni kenigo aga tigi me dolisąwai sesao. Te agai tama tibaso da, teda eno agai ofa mabo godolo homu yaibao.

²²Dagego te gedu widai kibu, ma sągą dwai, ma tigi dolai, ma bomai keni elalubo, ma tigi gesigo togai, ma buluba yai kibu yaibaso, enabolo ofa me elamuo. Dagego te tobage tigi poąį kibu te eno altade ofa elamo dao.

²³Te dagego ofa me deli duga homugo digi ebaso da, teda dagego te kibu nogo sągą kikasi pęwadage ma gagea pai selama, te sę ebaso usu yaibao. Tialima, dagego te tobage kibu tiwai selama, te dagego enaba dąų wali bomai po me deli usu nabo ofa yainu da, te tiwai sę me elamuo. Te habu dao.

²⁴Te kibu domo dolai baso, ma augwaligo togali ma pedali, ma augwaligo domo diasąwai baso, dagego te tobage kibu enabolo ofa me igio. Dagego te kibu dabe te tobage kolesagade te duga tǫ kantride doligio. Te habu dao.

²⁵Dagego te tobage kibu dabe te gasa bulu tǫ kantride bidi nogode selama, te ofa me elamuo. Te tiwai kibu dabe eno gedude wiegi yai menio. Eno te tobage ofa homu godolo me egobeo. Mu menio,” wali.

²⁶Te Genuai Bidigo te tiwai po Mosesbolo wali,

²⁷“Te bulmakau, me sipsip, me meme te wai ame nabo sogo da, teda te wai dabe aga ida dali te a naga me si sogo bidiyu bolo yao. Te nosali badu, dagego ofa ebo homu eyu da, te altaba sela pelama, ofa yagameo, eno dagego te ofa godolo homu ebo dao.