Pris Sę Ebo Bomai Po 20:12-25

¹²Te bidi me deligo aga ogwago we dali penani ebaso da, teda dagego augwali si ela muao. Augwa si deli kanemego te penani yali, tialima augwali sigo dobo sę yali sęgę elalubaso, te augwali si isimainao.

¹³Te bidi mego gasa bidi me penani ebaso, augwali sigo dwai sę genuai mu yalio. Tialima, dagego augwali si ela muao. Augwa si yali sę dagede naga augwa si isibao.

¹⁴Te bidi me deligo te we me we aga ida dali sabo si da, te dagego augwali sela ela munama, augwa tigi isiba ulao, magi baso meni, augwaligo dwai sę genuai mu yali, tama dagego te tobage kolesaga dage tomode ebo we me bidi te sula tagaligio.

¹⁵Te bidi me deligo te kibu sibi me penani ebo bidi, dagego te bidi ela muyu, te kibu me ela muao.

¹⁶Te we me deli te hasa sibiba pelama, te hasa sibigo aga penani emainogo ebaso da, dagego te we dali, te hasa dali, ela muao. Augwa si yali sęgęde augwali si isimainao,” wai dao.

¹⁷“Bidi me deligo aga abe mu ma sali, ma gasa aya ma idago wegi saibaso, te bidi me wego dwai kolesaga mu yalio. Tialima, tigidali we bidigo gedude dagego augwali siba wado po olama, te augwali si sela sąyu, te augwali si dage dali munu ma bidigio. Te bidi aga abe dali penani yali, tialima aga yali kolesagade sęgę tolomainao.

¹⁸Te bidi me deligo aga we te tigide bulu be gasi sai elalubadi te tąbaso da, teda augwali sigo eno gedude dwai meda yai kolesaga mu yali. Tama dagego augwali si eno we bidi hani tomode sela sąyao,” wali.

¹⁹“Te bidi me deligo aga ida sabi we dali, ma aga ayago abe dali penani ebaso, te aga deli kanemede te sęgę sobao, te augwa si yali dwai kolesagade sęgę tolomainao.

²⁰Te bidi mego aga aya sabi bidigo we dali penani yali da, te bidigo aga aya sabi bidi hale dwai mu ilibao. Tama te bidi me te we augwa si yali sęde sęgę tolao. Te bidigo sobaso da, teda agai te wai dabe ame nabo usu egobeo, me te aya sabi bidigo wego te wai dabe me ame nogobeo.

²¹Te bidi mego aga amago we anoma elama sali da, te agai dwai kolesaga mu Genuai Bidi eno gedude ebao, te aga ama hale ilibao. Tibaso, te bidigo me te wego wai me ame nogobeo,” te po wai dao.

²²“Dagego eno bomai po tigidali me eno po tigidali wali pao. Megi eno dage odasa pabo, te Kenan tǫ te agai dage me bugulisąma, te dage bugagia bidaibao.”

²³“Te ena Genuai Bidigo po odisąma te Kenan tǫde bidibo bidi dabego kolesaga dagego wali me pigio. Augwaligo te dwai sę yai baso, te eno augwali godolo homu mu ebeo. Te megi da, eno augwali te tǫ kantride sela sąnama, te dagego te tǫ sagameo.

²⁴Eno te po dagebolo wai dao, te tǫ da wiegi yai mu, te ili hauwa elalubao, te nai hauwa tede holaibao. Te eno dagebolo menama, te dagego tǫ mu pedelaibao. Ena Genuai Bidi, ena dagego God, te eno dage gasa hani tomode sali, te dage enaduba deligo we bidi naga bidimainogo yai dao.

²⁵Tama tialima, dagego te mena kibu hasa ba sibi me bugagia dagaliyu, te wiegi yai tuabo me tusiąma habu sabo me dagalao. Hasa me ba te eno gedude wiegi yai isąwani, te dagego habu sao. Eno te tobage nai dabe te wiegi yai isąwai nai po dagebolo wali, te hasa me ba te dwasianu nai me, tialima te dagego tubaso da, teda dage eno gedude meda mu pedelaibao.