Pris Sę Ebo Bomai Po 19:25-31

²⁵Tialima, te a naga wabo kibu bede te ni du walobo nai duga tuao. Eno te po dagego wali pobaso da, teda dagego ni du wai hauwa umabo walaibao. Odao, ena God, dagego Genuai Bidi, eno te po obao.”

²⁶“Dagego te kaneme elalubo kibu mi tugio. Te dagego haniani pobi wabo sę me te kebele aubo sę me igio.

²⁷Te dagego tobolu nisi te dagego olo pąde togogimio, te dagego penani nisi togolama pęwadage iligimio.

²⁸Te dagego tigide todogo pelama masalu ebo sę iligio. Te bidi isaide, ma we isaide homu dene eyu, duga tigi togobo sę igio. Ena Genuai Bidigo eno dagebolo te kolesaga dabe ebo habu mu selibao,” wali.

²⁹“Dagego te Godigo po odisąwai bidi dabego ebo kolesaga tiwai eyu, te duga wegi dabe te penanide sǫbo we dabe tiwai pedalumainu elamuo. Tiyu, dagego te tiwai sę eyu, te ena tagaluyu, te dage te tibo godide gone tuą peyu, haniani dwai sę yabuo. Te dagego bulu tigidalide te dwai kolesaga pągąna pidalio.”

³⁰“Dagego te olo toma neyu bidibo sogo, te Sabat side, sę munu me igio. Dagego te we bidi dabe aselama, te enaba lotu po wagasobo sel Ugwa Be godolo mu yao. Ena Genuai Bidi, eno dagebolo wai dao,” wali.

³¹“Te dagego wiegi yai homu kolesaga sabo homu ebaso da, teda pelama, te isali bidi dabego noma bidi dali po mibo bidi dabeba me hanalugi pigio, te noma bidide homu kolesaga selama, dageba momainogo igio. Te dagego tama sę ebaso da, te dage eno gedude meda pedelaibao. Ena Genuai Bidi, ena duga God, eno te po wai dao.”