Pris Sę Ebo Bomai Po 18:15-25

¹⁵Nago te naga ogwago we dali penani sę igio. Magi baso meni, te nago we menio, teyu te nago aga dali penani ebo sę habu mu dao.

¹⁶Nago naga amago we dali penani igio. Te nago aga dali pibaso da, teda nago ama hale dwai mu ilibo sę ebo dao.

¹⁷Te nago we me deli sali, te wego gasa bidide wegi ame naibaso da, teda nago te wai ma sigio, ma agai wegi me sigio. Te nago wego ogwago wegi me, te nago me somainu elamo dao,” wali. “Magi baso meni, te we dabe te nago wego deli kaneme elalubao. Te nago augwaliba dwai sę ebaso da, teda nago te hale genuai ebo kolesaga ebao.

¹⁸Nago naga wego ama nago sigio, te nago we bidibadi sigio. Tiyu, nago augwa si wado yabo sę ilabuo. Te kolesaga dolo ebeo,” te po wai dao.

¹⁹“Nago te we poluago elai gasi sai elalubadi te penani igio, magi baso meni, te sogo aga wiegi yai me elalubeo.

²⁰Nago naga abagigo we dali penani me igio. Nago tama tibaso da, teda nage eno gedude meda pedelaibao,” wali.

²¹“Odao, ena duga Genuai Bidi eno dagebolo te duga wai dabe elama, te isiba ulama, te tibo god Molekba ofa ebo habu selama, te po eno dageba bomai po obao. Tiyu, dagego eno nogi aiyaba elaluidalio, te dagego God dao,” wali.

²²“Te bidi duga hasigo te gasa bidi tągio. Te dwai kolesaga mu ebao, te eno homude godolo me egobeo.

²³Bidi dagego te so hasa kibu sibi me te tągio, te we dagego te hasa sibigo dage tąmainogo sula tagaligio. Te kolesagade dage eno gedude meda pedelaibao. Te tebo kolesaga dwai nai mu dao,” wai dao.

²⁴“Dagego te dwai kolesaga dabe me elamuo. Te sę dagego eyu da, teda dage eno gedude meda pedelaibao. Te ena Genuai Bidigo po odisąwai hani bidi dabe te Kenan tǫde bidaluyu, augwaligo te tobage dwai kolesaga dabe elama, te augwali meda mu pedelalio. Te megi eno augwali ela gudulubo sę ebao, te dagego augwaligo tǫ somainogo ebo dao.

²⁵Te augwali dwai kolesagade te tǫ digi meda pedelali. Te augwaligo tǫba eno dwai dene mabo sę elama, tama te tǫgo te Genuai Bidigo po odisąwai hani bage te bugubo tiwai eyu, te augwali Kenan tǫde munu ma bidalugobeo.