Pris Sę Ebo Bomai Po 13:10-46

¹⁰“Te bidi te prisgo bugagia osa yao. Te keni tedela eyu, te tigi nisi tedela pedelama, tama te kenide keni bole pągąną pobaso da,

¹¹teda te bidi te oiyabe gasi dolo elalubao. Tama prisgo te bidiba te tiwai po wao, ‘Nage wiegi yai me ebeo.’ Prisgo koneani, te bidi wiegi yai ebeo, tama tiyu, te bidi agaduba deli bidimainogo me elamu dao.

¹²Tama te gasi genuai mu pedelama, te bidigo tigi tigidali usu nubaso da,

¹³teda prisgo te bidigo tigi bugagia osa yao. Te prisgo suali digi te gasigo te bidigo tigi tigidali usu nama, te tigi tigidali tedela ebaso da, agai te bidibolo te tama po wao, ‘Nage Godigo gedude wiegi yai yalio.’ Te bidi wiegi yai mu yai dao.

¹⁴Tiali goli, nosali te keni ulu podilama, te tomode elalubo mi hanilibaso da, teda te bidi wiegi yai mu me ebe dao.

¹⁵Prisgo te keni ma sulama, agai suali keni te tiwai ulu podilaibaso, agai te bidibolo walao, ‘Nage wiegi yai ebeo.’ Te keni elalubo bidi te keni ulu podilama, te keni tomode mi elalubo bidi da, aga eno gedude wiegi yai me egobeo. Te tobage keni te dwai mu dao.

¹⁶Tialima nosali, te keni pedela selama, tigi tedela pedalubaso da, teda te bidi te prisba ma pomainao,” wali.

¹⁷“Te prisgo te bidi bugagia ma sulama, agai suali te keni pedela selama, te tigi tedela yaibaso da, teda te bidi eno gedude wiegi yai yalio. Te prisgo agabolo te tiwai po walao, ‘Nage wiegi yai mu yai dao,’ po wao,” wali.

¹⁸“Te bidi me deli tigide dili keni elama, te keni pedela selama,

¹⁹tama nosali dili keni yali madi du elama, tedela pedalubaso, ma tigi mama yai me tedela dali elalubaso da, teda te bidi prisba pao,” wali.

²⁰“Tama prisgo te bidi dili keni yali pesage bugagia suao. Te keni dwasianu tomoba pelama, te badu tigi nisi te tedela pedelai baso da, teda prisgo te bidibolo te tiwai po walao, ‘Nage God gedude wiegi yai ebeo.’ Te gasi te dili keni pedela sali pesagede pedelali da, te dwai nai mu dao.

²¹Tiali goli, prisgo te tigi sulama, agai te tigi nisi tedela isąwai sulama, te keni tigi wali tomoba pisąwai, agai te usu ma yabo tiwai tonobo homu ebaso da, teda prisgo agaduba munama bidibadi, te Sarere deli bidama, te nogo a naga olama, te me badu nogo si wagi solama sogo usu nama bidao.

²²Te nosali te 7 wabo sogo te nai genuai pedalubaso da, teda te dwai nai mu da, te prisgo bidibolo te tama po walao, ‘Nage te God gedude wiegi yai ebeo,’ po wao.

²³Tiali goli, te tigide dąį ilali te tiwai me tama elaludu, te genuai pedalisąbaso da, teda te dili kenigo dila pali tigi wali te masalu pedela salio, te tama dao. Tama te prisgo te bidibolo te tiwai po wao, ‘Nage te God gedude wiegi yai yali dao,’” wali.

²⁴“Te isigo bidi me deli tigi dai madi, te keni mama yai ma tedela yai te pedalubaso da,

²⁵teda prisgo te keni bugagia osola suao. Te keni tedela yali madi te kenide tigi nisi pedelama, te siago ulali madi keni tomoba paibaso da, teda te keni dwai nai mu dao. Tibaso, prisgo te bidibolo te tama po wao, ‘Nage God gedude wiegi yai ebeo,’ po wao.

²⁶Te keni elalubo madi tigi nisi te tedela yai pedalisąma, te keni tomoba pisąma, te suali madi pedela sabo homu tiwai ebaso da, teda prisgo te bidi agaduba munama bidibadi, te 7 wabo sogo usu nama bidimainao.

²⁷Te 7 wabo side te prisgo aga ma osola suao. Te keni genuai pedelai baso, te keni dwai mu dao. Te prisgo agabolo te tiwai po walao, ‘Nage dwagi yai me ebeo,’ te po wao.

²⁸Tiali goli, te keni me tama elalubaso, te genuai pedalisąbaso da, teda te tigide isigo ulali madi masalu naga elalubao. Tialima, prisgo te bidibolo te po walao, ‘Nage God gedude wiegi yai dao,’” wali.

²⁹“Te bidi me deli ma we buluba keni keni te tobolude pedalubaso, ma penanede keni ebaso da,

³⁰teda prisgo te buluba keni bugagia suao. Te prisgo homugo te keni keni tigi tomoba pali homu elama, te agai suali te buluba keni yali pesagede te tigi nisi hauwa elalu, te tigi nisi sęwa yaibaso da, teda prisgo koneama, te buluba keni keni dwai nai mu da homu yaibao. Agai te po te bidibolo walao, ‘Nage God gedude wiegi yai ebeo,’ wao.

³¹Tiali goli, prisgo aga subo sogo, te agai suali te buluba keni kenigo tigi wali tomoba sela pabeo, te buluba keni elaluali madi tigi nisi wiegi yai me pedalisąwai, tialima agai te bidi agaduba munama, te Sarere deli bidimainao,” te po wai.

³²“Te 7 wali side me tama elalubaso da, prisgo te bidigo tigi ma osola suao. Te buluba keni me tama elaluyu, te genuai pedalisąma, te prisgo homugo te tigi tomoba pogobe homu eyu, tama te badu sęwa yai tigi nisi pedalisąbaso da,

³³teda te bidi aga tobolu nisi me penani nisi tigidali poayao, tiali goli te keni elalubo madi poagio. Te nosali prisgo te bidi agaduba tedali bididubadi, te nogo a naga olama, me badu nogo si wagi solama sogo ma bidimainao.

³⁴Tama te 7 wabo sogode prisgo te bidigo keni keni ma suao. Te keni keni te tama tiwai me elalu, te genuai me isąyu, tama prisgo homugo te keni tigi tomoba pabe homu eyu da, te agai te bidibolo te tiwai po wao, ‘Nage God gedude wiegi yai yalio.’ Tialima, te bidigo ugwa ąį telabaso, te wiegi yai ebo dao.

³⁵‘Nage wiegi yai yalio,’ te prisgo te po wali sogo tudi badu nosali te habo keni genuai pedelai baso da,

³⁶teda te prisgo aga ma osola suao. Te habo keni genuai pedelai baso da, teda prisgo te tiwai koneao, te bidi wiegi yai ebeo homu yao, tama agai te sęwa yali nisi munu me gegegio,” wali.

³⁷“Tialima, te prisgo aga suali madi, te habo keni te tiwai me elaluabo homu eyu, te genuai pedalugobe homu elama, tama te keni yali madi wiegi yai tigi nisi pedalubaso da, teda te habo keni silalio. Tialima, prisgo agabolo te tama po walao, ‘Nage God gedude wiegi yai yalio.’”

³⁸“Te bidi ma we me deligo tigide tedela yai nai meba pedelai elalubaso da,

³⁹teda prisgo te tigide dąį elalubo bugagia suao. Te dąį elalubo te olo tedela elaluyu, te ula mu meni baso da, teda te dąį olo tama te tigide pedelali homu yao. Tama tialima, te bidi eno gedude wiegi yai yali dao,” wali.

⁴⁰“Te bidigo tobolu nisi meniama wane paibaso da, teda aga eno gedude meda elalubeo. Menio. Aga wiegi yai bidi dao.

⁴¹Te tobolu nisi tomo bulude naga, te wane pai bidi yai baso da, teda te bidi aga eno gedude meda meni yai wiegi yai bidi dao.

⁴²Tiali goli, te wane pai bidi tobolude te keni pedelama, te kenigo au te mama yai me tedela elalubaso da, teda te keni dwai mu dao.

⁴³Te prisgo bugagia osola suao. Te kenigo au te mama yai ma tedela yai elalu, te oiyabe yai bidigo keni tiwai elalubaso da,

⁴⁴teda te tobolu wanede keni te dwai nai mu dao, te prisgo agabolo te tiwai po wao, ‘Nage Godigo gedude wiegi yai ebeo.’”

⁴⁵“Bidi me delide te tobage keni elalubaso, agai te pisila pai ugwa munama, te tobolu nisi yaga sigio. Tama aga nogogo pedauwali pania selama, te tiwai i wao, ‘Ena dwagi yai menio. Ena dwagi yai menio,’ te tama po wao.

⁴⁶Sesemane sogo te tobage keni elalubo bidi, aga eno gedude wiegi yai me ebeo. Agai te aga abagi dabe tagalama, te bidibo pesage bulu badu tedali bidao,” te po wai dao.