Prabebs 8:3-22

³Im oldei jandapbat wansaid langa det geit blanga det taun en im oldei jinginat deya.

⁴Im tok, “Mi na jinginat langa yumob. Mi jinginat langa ola pipul langa dijan wel.

⁵Yumob stil jinggabat ebrijing jis laiga biginini. Yumob garra lafta growap. Yumob silibala pipul. Yu garra lafta len mowa blanga andasten brabliwei.

⁶“Wal yumob lisin langa main brabli gudwan wed. Mi oldei dalimbat yumob blanga ola raitwan ting.

⁷Wanim ai dalimbat yumob im brabli trubala. Ai nomo laigim detlot laiyawan wed.

⁸Ebrijing mi oldei toktokbat im brabli trubala, en nomo laiyawan weya garra lidimbat yumob rongwei.

⁹If yumob sabi brabliwei, yumob sabi main wed im brabli gudwan blanga yumob.

¹⁰Yumob garra laigim main wed. Im mobeda den silba. En blanga jidan garram klebabala main, im mobeda den gol.

¹¹“Wal mi na brabli sabibala. Mi mobedawan langa detlot purdiwan ston, en mi mobedawan langa ol detlot enijing weya yumob wandimbat.

¹²Mi na brabli sabibala, en mi sabi ebrijing. Ai garram brabli gudbala main en oldei gibit ebribodi feyago.

¹³If yumob shoum rispek langa YAWEI en meigim im mowa haibala, wal yumob garra libum detlot nogudbalawei. Ai nomo laigim det praudbalawei, en ola laiyawan wed en ola nogudbala ting.

¹⁴Ai meigim ola plen en ai kipum olataim. Ai garram brabli gudbala main en mi brabli strongbala du.

¹⁵Mi oldei album ola king en ola lida olabat blanga jidan bos, en meigim ola gudwan lowa.

¹⁶Mi na oldei album ola boswan blanga jidan bos, en album ola lida olabat du.

¹⁷Ai laigim detlot pipul hu laigim mi, en detlot pipul hu lukabat mi, garra faindim mi.

¹⁸Ai garra meigim pipul rispek langa yumob, en meigim yumob jidan ritjwan olataim. En ai garra meigim ebrijing hepin gudwei blanga yumob.

¹⁹Wanim yu gajim brom mi, im mobedawan langa det brabli gudwan gol, en im mobedawan langa det brabli gudwan silba.

²⁰Mi oldei wok langa det raitwei. Mi bulurrum det gudwan roud weya gibit ebribodi feyago,

²¹en mi oldei gibit main enijing langa detlot pipul hu laigim mi, en mi oldei bilimap olabat haus garram ola gudbala ting.

²²“Wal mi na bin jidan garram YAWEI wen imbin stat meigimbat dijan wel. Aibin iya longtaim bifo imbin meigim ebrijing.