Prabebs 7:12-23

¹²Det gel bin oldei weidabat blanga eni yangmen langa eni roud o langa makit pleis.

¹³“Wal det gel bin grebum det yangmen en kis langa im, en im nomo bin sheim, najing. Imbin luk im streit langa im ai en imbin tok,

¹⁴‘Ai garram det bifpat brom det sekrifais ofring langa main kemp,

¹⁵en aibin kamat iya blanga lukabat yu, en aibin faindim yu iya.

¹⁶Aibin gaburrumap main sweig garram det brabli purdiwan matiriyal brom Ijip.

¹⁷Aibin meigim main sweig smel brabli gudwan garram detlot gudsmelwan medisin.

¹⁸Yu kaman en yunmi go en silipsilip deya raidap ailibala. Yunmi meigim miselp gudbinji en abum gudtaim.

¹⁹Main hasbin im nomo iya. Imbin gowei longwei langa najawan kantri.

²⁰Imbin gowei fo dubala wik, en imbin deigim loda mani.’

²¹Lagijat na det gel bin tok garram switbala wed en imbin meigim det yangmen gudbinji, en imbin lidim det yangmen blanga dum rong ting.

²²“Wal streidawei det yangmen bin bulurrum det gel jis laik det buligi wen dei lidim im langa det pleis weya dei garra kilim im, o jis laik det enimul wen im git trep,

²³en sambodi shudum det erro thru langa im hat. Imbin git trep jis laik bard weya gowin langa det net. Im nomo bin sabi im laif langa deinja.