Prabebs 6:3-13

³Wen yu dum lagijat, wal det men garra jidan bos blanga yu na. Bat ai dalim yu hau blanga jidan friwan. Yu garra go kwikbala langa det men en yu garra askim im gudwei blanga larramgo yu fri brom det pramis weya yubin meigim garram im.

⁴Yu nomo go en silip o abum spel.

⁵Yu garra meigim miselp friwan brom det trep jis laik wen det bard o enimul gidawei brom det hanta.

⁶“Wal ola leisibala pipul garra len brom detlot lilwan ent hau dei oldei jidan.

⁷Detlot ent nomo garram eni bos o lida, najing,

⁸bat hotwethataim olabat oldei pudumwei ola daga redibala blanga det kolwethataim.

⁹Haulong det leisibala men garra silip? Wotaim im garra gidap brom silip?

¹⁰Im tok, ‘Ai garra abum lilwan silip. Ai jis garra dabulumap main am dubala en abum spel na.’

¹¹Bat wen im silip, streidawei im garra jidan brabli powan na, jis laik sambodi bin stilimbat ola ebrijing brom im.

¹²“Wal sambala pipul brabli wikitwan en dei oldei goran ebriweya en dalimbat laiya.

¹³Dei oldei mubumbat olabat hed blanga meigim yu bilib, bat olabat laiya.