Prabebs 4:5-22

⁵Yu garra sabi en len mowa blanga ola gudwan klebabala ting. Yu nomo fogedabat en tjakidawei main wed.

⁶Yu garra oldei jinggabat en teiknodis blanga det sabibalawei en im garra album yu. En if yu laigim im brabliwei, wal im garra kipum yu seifwan.

⁷Blanga jidan sabibala im brabli speshalwan ting. Wal tharran na yu garra sabi. Im mobeda den enijing.

⁸Wen yu jinggabat en laigim det sabibalawan im gin meigim yu jidan haibala.

⁹Yu garra jidan haibala jis laik wen yu win det reis o pipul meigim yu jidan bos.’ Lagijat na main dedi bin tok wen aibin lilboi.

¹⁰“Main biginini, yu lisin langa mi na en yu kipum ol detlot wed weya ai oldei dalimbat yu, wulijim yu garra jidan laibala longtaim.

¹¹Mi na bin shoumbat yu det sabibalawei en det raitwei blanga jidan gudbalawei.

¹²Nomo enijing kaan stapam yu wen yu wok langa det sabibalawei, en nomo enijing kaan meigim yu buldan wen yu ran.

¹³Yu garra oldei jinggabat wanim yubin len en yu nomo larramgo. Yu garra oldei kipum ol detlot wed yubin lenlenbat, dumaji olabat brabli speshalwan blanga yu laif.

¹⁴Yu nomo bulurrum det wei blanga detlot nogudwan pipul, en yu nomo dum detlot nogudbala ting olabat dumbat.

¹⁵Yu nomo bulurrum olabat wei. Yu go yu ronwei,

¹⁶dumaji ola nogudbala pipul kaan silip raidap olabat dum det nogudbala ting en ardim sambodi.

¹⁷Wen olabat oldei dumbat nogudbala ting en ardimbat pipul, wal tharran im jis laik det daga en dringk blanga olabat.

¹⁸“Wal det wei blanga ola gudbala pipul im jis laik det san wen im gidap ailibala en im kipgon meigim ebrijing mowa braitwan.

¹⁹Bat det wei blanga ola nogudbala pipul im jis laik wen olabat wokwok langa det dakbala roud naitaim en dei kaan luk wanim bin meigim olabat buldan.

²⁰“Main biginini, yu lisin en teiknodis langa main wed. Yu lisin brabli gudwei wanim mi dalimbat yu.

²¹Yu nomo fogedabat main wed. Yu kipum holot insaid langa yu hat.

²²Dijan wed garra meigim yu jidan brabli gudwei en nomo garram siknis.