Prabebs 31:2-14

²“Lemyuwel, yu na main ronwan san en yu jidan det ensa blanga main preya. Wal yu irrim gudwei wanim ai garra dalimbat yu.

³Yu nomo weistimbat yu taim en silipsilip garram detlot wuman hubin binijimap laif blanga loda king.

⁴Lisin Lemyuwel! Ola king kaan dringgimbat loda wain en jidan drangginbala en dei kaan wandimbat grog olataim.

⁵Dumaji if yu dringgimbat tumatj im meigim yu fogedabat wanim yu garra dumbat en yu garra ardimbat ola po pipul.

⁶Grog im blanga detlot pipul hu gulijap dai en detlot hu oldei jidan sedwan.

⁷Larram olabat dringgimbat en fogedabat ola trabul dei abumbat.

⁸“Bat yu garra lukaftumbat detlot pipul hu nomo garram enibodi blanga albumbat olabat en hu nomo garram enijing.

⁹Yu garra oldei gibit feyago en album detlot po pipul en detlot pipul hu nomo garram enibodi.”

¹⁰Im brabli ad blanga faindim brabli gudwan waif. Det gudwan waif im mobeda den ola purdiwan ston.

¹¹Im hasbin trastimbat im brabliwei en im oldei album im blanga gajim ola gudwan ting.

¹²Im jidan gudbalawei langa im hasbin ebridei,

¹³en gudbinjiwei im oldei meigimbat klos garram im bingga blanga ol im femili.

¹⁴Im gajim daga brom loda difrinwan pleis jis laik det bigwan bout weya oldei bringimap daga brom longweiwan pleis.