Prabebs 31:13-27

¹³en gudbinjiwei im oldei meigimbat klos garram im bingga blanga ol im femili.

¹⁴Im gajim daga brom loda difrinwan pleis jis laik det bigwan bout weya oldei bringimap daga brom longweiwan pleis.

¹⁵Im oldei gidap ailibala en meigim daga redibala blanga im femili en im oldei dalim ola wekingel wanim dei garra dumbat.

¹⁶Im sabi hau blanga lukaran blanga baiyim len blanga growimap greip fam.

¹⁷Im brabli strongwan en im oldei dumbat adwek.

¹⁸Im sabi det rait taim blanga baiyim o selim enijing en im oldei dumbat wek raidap leitbala.

¹⁹Im oldei meigimbat im ronwan matiriyal,

²⁰en im oldei albumbat detlot po pipul en detlot hu nomo garram enibodi blanga albumbat olabat.

²¹Im nomo wori blanga im femili wen im brabli kolwethataim, dumaji olabat garram womwan klos weya imbin meigim.

²²Im oldei meigim ola purdiwan bleingkit blanga im femili, en im ronwan klos brabli purdiwan.

²³Ebribodi sabi en rispek im hasbin hu jidan wanbala lida langa det taun.

²⁴Det gudwan waif oldei meigimbat klos blanga selimbat langa ola shopmenija.

²⁵Im brabli strongbala en kainbala, en ebribodi rispek langa im en im nomo bradin langa det taim weya garra kaman bambai.

²⁶Im oldei tok garram gudwan wed en im oldei tok ola wed blanga meigim najalot pipul jinggabat ebrijing gudwei.

²⁷Im oldei lukaftumbat im femili en im nomo jidan leisibala.