Prabebs 30:19-32

¹⁹hau detlot igulok oldei flaiflaibat ontop langa skai, hau detlot sneik oldei kraulkraulbat ontop langa ola ston, hau detlot bout faindim olabat wei langa solwoda, en hau boi en gel oldei laigim gija.

²⁰Det waif hu oldei silipsilipbat garram det men hu nomo im hasbin, im oldei tok, “Wen mi silip garram naja men, ai nomo dum enijing rong.”

²¹Dislot fobala ting meigim dijan graun sheiksheik en det graun nomo laigim. Olabat na

²²det wekinmen hu jidan laiga prisana en dei meigim im king, det silibala men hu oldei dagadagatbat tumatj daga,

²³det wuman hu nobodi laigim wen im faindim hasbin, en det wekingel hu deigim pleis blanga im gelwan bos.

²⁴Dislot fobala brabli lilwan enimul jidan langa dijan wel, bat olabat brabli klebawan.

²⁵Jinggabat detlot ent. Olabat nomo strongbala bat dei oldei pudumwei olabat daga ebri hotwethataim.

²⁶Jinggabat detlot rok walabi. Olabat nomo garram pawa, bat olabat oldei jidan langa ola stoni pleis.

²⁷Jinggabat detlot grashopa. Olabat nomo garram king, bat dei wokwok jis laik ami.

²⁸Jinggabat detlot lisid. Yu gin holdim garram yu bingga, bat dei gin gowin snikinwei langa ola bigwan haus blanga ola king.

²⁹Dislot fobala ting oldei wokwok praudbalawei.

³⁰Jinggabat det laiyan. Im nomo bradin blanga enijing, en im jidan bos blanga detlot bush kantri.

³¹Jinggabat det boiwan jukjuk. Im jingat praudbalawei. Jinggabat det boiwan gout. Im oldei wokaran praudbalawei. Jinggabat det king. Im wokwok lida langa im ami.

³²If yu oldei jidan praudbala en silibala en meigimbat nogudwan plen, yu garra stap dumbat lagijat.