Prabebs 26:1-15

¹Wen sambodi preisim det siliwan men, tharran nomo rait. Im jis laik bigis rein weya kaman langa draisisantaim, o sno weya buldan langa hotwethataim.

²If sambodi tok brabli nogudbalawei langa yu en detlot wed nomo trubala im kaan ardimbat yu. Detlot wed jis gowei, jis laik det bard wen im flaiwei.

³Yu yusum det wip blanga meigim det hos go kwikbala en yu braidulimap det dongki blanga meigim im dum wanim yu wandim. Seimwei du yu garra yusum wadi langa det silibala men.

⁴If yu ensa siliwan kwestjan, wal yu silibala jis laik tharran hubin askim det siliwan kwestjan.

⁵Wen yu ensim siliwan kwestjan, yu garra meiksho det sambodi hubin askim det kwestjan sabi det kwestjan im brabli siliwan.

⁶Wen yu jandim mesij garram siliwan men, im jis laik yu kadimof yu fut o dringgim poisin.

⁷Det silibala men hu tok garram sabibala wed, im jis laik det men hu garram dubala kripulwan leig en kaan mubaran.

⁸Wen yu preisimbat silibala men, im jis laik yu taiyimap det ston taitwan langa det shangai en yu kaan shudum enijing.

⁹Det silibala men hu tok sabibala wed, im jis laik drangginmen hu trai blanga pulumat det lilwan bindiyai brom im bingga.

¹⁰Im nomo gud ting blanga shudum erro langa enibodi hu gopas langa yu, en im nomo gud ting blanga meigim detlot pipul hu nomo sabi enijing wek blanga yu du.

¹¹Jis laik dog oldei gobek en dagat im baku, wal lagijat du det silibala men oldei gobek en dumbat ola seimwan silibala ting.

¹²Det brabli siliwan men im jidan mobeda den det silibala men hu reken im brabli sabibala.

¹³Nomo jidan leisibala en tok, “Det laiyan im deya atsaid. Im mait dagadagat mi.”

¹⁴Det leisibala men im rolabat langa im sweig wulijim det dowa weya im swingswingbat miselp.

¹⁵Sambala jidan brabli leisibala en dei kaan lidimap olabat bingga blanga fidim miselp.